Zëvendëspresidenti i Komisionit Evropian dhe shefi i diplomacisë së BE-së, Josep Borell ka kërkuar nga Kosova që të implementojë marrëveshjen për Asociacionin dhe vendimin e Kushtetueses për Manastirin e Deçanit.
Kryediplomati evropian në një përgjigje të tij të një pyetje parlamentare të Parlamentit Evropian, ka thënë se BE-ja ia ka përkujtuar vazhdimisht Kosovës që ta zbatojë vendimin për Manastirin e Deçanit dhe marrëveshjen për themelimin e Asociacionit, raporton teve1.info.
“BE-ja vazhdimisht u ka përkujtuar institucioneve të Kosovës që të zbatojnë me shpejtësi dhe në tërësi aktgjykimin e Gjykatës Kushtetuese për pronësinë e tokës në Manastirin e Deçanit pa ndonjë vonesë të mëtejshme. Të dyja palët, Kosova dhe Serbia ranë dakord për themelimin e Asociacionit/Bashkësisë së Komunave me Shumicë Serbe në Marrëveshjen e Brukselit të vitit 2013. Marrëveshja ishte ratifikuar nga parlamenti i Kosovës dhe Kosova duhet të përmbushë detyrimin e saj ligjor dhe të zbatojë atë pa vonesa. Të dyja palët duhet të përmbushin të gjitha detyrimet e tyre ligjore ndërkombëtare dhe të zbatojnë marrëveshjet e nënshkruara”, ka thënë Borell.
Tutje, Përfaqësuesi i Lartë i BE-së për Siguri dhe Politikë të Jashtme ka thënë se Kosova dhe Serbia e kanë pikë kyçe arritjen e marrëveshjes për normalizimin e marrëdhënieve për rrugën e tyre evropiane.
“Ata (Kosova dhe Serbia) gjithashtu duhet të bëjnë përpjekje të mëtejshme thelbësore me qëllim për të arritur një marrëveshje gjithëpërfshirëse ligjërisht të detyrueshme për normalizimin e marrëdhënieve, e cila është kyçe në rrugët e tyre evropiane”, ka thënë ai.
Tutje, kryediplomati Borell ka thënë se BE-ja monitoron nga afër zhvillimet në Kosovë sa i përket sundimit të ligjit, mbrojtjes së të drejtave dhe lirive themelore përfshirë të drejtat e komuniteteve pakicë.
“BE-ja i kushton rëndësi të madhe sundimit të ligjit, mbrojtjes së të drejtave dhe lirive themelore, duke përfshirë të drejtat e komuniteteve joshumicë dhe lirinë fetare, dhe nga afër monitoron të gjitha zhvillimet në këto fusha në Kosovë. Adresimi i nevojave të serbëve të Kosovës komuniteti joshumicë është një element i rëndësishëm për akterët e BE-së në Kosovë. Si Zyra e BE-së në Kosovë/Përfaqësuesi Special i BE-së (PSBE) dhe Politika e Përbashkët e Sigurisë dhe Mbrojtjes misioni në Kosovë (EULEX) monitoron gjendjen e të gjitha komuniteteve joshumicë. Misioni i BE-së për Sundimin e Ligjit në Kosovë (EULEX Kosovë) po e mbështet në mënyrë aktive institucionet e zbatimit të ligjit në Kosovë në forcimin e shtetit të së drejtës, duke përfshirë përpjekjet e tyre që të hetojë incidentet e sigurisë që lidhen me objektet fetare dhe kulturore”, ka shtuar Borell.
Pas situatës së tensionuar në veri të dielën, Josep Borell i ka ftuar kryeministrin Albin Kurti dhe presidentin Aleksander Vuçiq për një takim të nivelit të lartë në Bruksel në mënyrë që të kapërcehet situata sa i përket reciprocitetit me targa dhe dokumente mes dy vendeve.
