Presidenti i Francës, Emmanuel Macron tha se nuk do të japë dorëheqje “pavarësisht rezultatit” në zgjedhjet e parakohshme që njoftoi se do të mbaheshin mes 30 qershorit dhe 7 korrikut, pasi e djathta ekstreme u rendit e para me një diferencë të madhe në votimin e mbajtur në vend për zgjedhjet e Parlamentit Evropian (PE), transmeton Anadolu.
Në një intervistë për gazetën “Le Figaro”, Macron u përpoq të sqarojë se përse e ndjeu të nevojshëm vendimin për zgjedhjet e përgjithshme të parakohshme.
Ai tha se nuk do të pranojë një kërkesë për dorëheqje në rast se partia e ekstremit të djathtë Uniteti Kombëtar (RN) fiton zgjedhjet e përgjithshme. “Nuk është RN ajo që shkruan kushtetutën. Cili do të jetë rezultati institucionet janë të qarta dhe pozicioni i presidentit është gjithashtu i qartë”.
“Politika është një dinamikë dhe nuk u besoj sondazheve. Rezultatet e arritura për çdo zonë zgjedhore, nuk duhet t’i shohim nën dritën e rezultateve të arritura në zgjedhjet e PE-së”, tha Macron.
Lidhur me vendimin për shpërbërjen e Parlamentit, Macron mbrojti idenë se “Ky ishte vendimi i drejtë për të mirën e vendit” dhe shtoi se “Ka menduar vetëm Francën”.
“Shpërbërja është gjesti më i qartë, më radikal dhe më i fortë. Besimi i madh ndaj popullit francez është gjesti i tij”, tha Macron i cili shtoi se vendimin e tij për zgjedhje të përhershme e ka marrë “për të qartësuar situatën”. Ai i bëri thirrje popullit francez që “të mos ketë frikë dhe të shkojë të votojë”.
Në zgjedhjet e mbajtura në Francë për PE-në, partia RN e ekstremit të djathtë u rendit në vendin e parë me një diferencë të madhe me 31.37 për qind të votave ndërsa partia e Macronit, “Renaissance” doli e dyta me 14.60 për qind.
Pas njoftimit të rezultateve të zgjedhjeve të PE-së, Macron shpërbëu Parlamentin dhe njoftoi se ka marrë vendim për të shkuar në zgjedhje të parakohshme.
