Ushtria izraelite ka bërë të ditur se Hassan Nasrallah, sekretari i përgjithshëm i grupit libanez Hezbollah, është vrarë në një sulm madhor ajror në periferi në jug të kryeqytetit libanez Bejrut, raporton Anadolu.
Nasrallah thuhet se u vra në sulmet ajrore “intensive dhe të paprecedentë” mbrëmë nga avionët izraelitë F-35 në një shënjestër në lagjen Haret Hreik, ku dhe ndodhet bastioni kryesor i Hezbollahut në Bejrutin jugor.
Menjëherë pas sulmeve, zëdhënësi i ushtrisë izraelite, Daniel Hagari, tha se sulmi kishte në shënjestër shtabin kryesor të Hezbollahut, për të cilin ai pretendonte se ishte ndërtuar nën ndërtesa civile.
Nasrallah prej kohësh ka qenë një shënjestër shumë e vlefshme për Izraelin për shkak të udhëheqjes së tij të Hezbollahut, një nga kundërshtarët kryesor ushtarak të Tel Avivit.
Izraeli bëri disa përpjekje për ta vrarë atë në konfliktet e mëparshme të armatosura, por të gjitha kishin dështuar.
Shefi i Hezbollahut ishte renditur si një terrorist ndërkombëtar që nga viti 1995 nga Departamenti i Shtetit i SHBA-së, i cili ofroi një shpërblim deri në 10 milionë dollarë për informacionin që çonte në kapjen ose vendndodhjen e tij.
Kush është Hassan Nasrallah?
Hassan Nasrallah lindi më 31 gusht të vitit 1960 në fshatin Bazouriyeh afër qytetit Tyre në Libanin jugor.
Ai është i martuar me Fatima Jassin-in dhe kanë pesë fëmijë, Hadi, Zeinab, Mohammad Jawad, Mohammad Mahdi dhe Mohammad Ali. Më i madhi i tij, Hadi, u vra në përleshjet me ushtrinë izraelite në Libanin jugor në vitin 1997.
Nasrallah mori një arsim fetar në seminaret muslimane shiite në Liban, Irak dhe Iran. Ai iu bashkua lëvizjes politike Amal në shkollën e mesme dhe u ngrit në byronë e saj politike në 1979.
Në vitin 1982, mes mosmarrëveshjeve se si t’i rezistonin pushtimit izraelit të Libanit, Nasrallah dhe disa të tjerë u larguan nga lëvizja Amal dhe iu bashkuan Hezbollahut, një grup i sapoformuar në atë kohë. Ai u vu në krye të mobilizimit të luftëtarëve në Luginën Bekaa të vendit.
Në vitin 1985, Nasrallah u transferua në kryeqytetin Bejrut dhe u bë nënkryetari i rajonit. Më vonë, ai mori rolin e shefit ekzekutiv, i ngarkuar me zbatimin e vendimeve të Këshillit Shura të grupit.
Udhëheqja e Hezbollahut
Nasrallah u emërua sekretar i përgjithshëm i Hezbollahut më 16 shkurt të vitit 1992, pas vrasjes së paraardhësit të tij Abbas al-Musawi në një sulm ajror izraelit.
Nën udhëheqjen e Nasrallah-it, Hezbollahu nisi një sërë operacionesh strategjike kundër Izraelit, duke kulmuar me tërheqjen e forcave izraelite nga Libani jugor në vitin 2000 pas një pushtimi 22-vjeçar.
Në vitin 2004, ai luajti një rol kyç në negocimin e një shkëmbimi të madh të të burgosurve me Izraelin, duke çuar në lirimin e qindra të burgosurve libanez dhe arab.
Roli i tij në sigurimin e tërheqjes së Izraelit nga Libani jugor në nivel lokal i dha atij titullin “udhëheqës i rezistencës”, veçanërisht pas konfrontimit të mëvonshëm të Hezbollahut me Izraelin gjatë Luftës së Libanit të vitit 2006.
Fjalimet e zjarrta dhe angazhimi i tij për t’u kundërpërgjigjur ndaj sulmeve izraelite, veçanërisht në mbrojtje të palestinezëve, e forcuan më tej popullaritetin e tij në të gjithë botën arabe dhe islame.
Megjithatë, popullariteti i Nasrallah-it u zvogëlua për shkak të mbështetjes së Hezbollahut për regjimin sirian kundër forcave të opozitës gjatë luftës civile të vazhdueshme në Siri, e cila shpërtheu në vitin 2011.
Qëndrimi i tij u ringjall pas operacionit “Vërshimi i Al-Aksasë” i nisur nga fraksionet palestineze, duke përfshirë Hamasin dhe Xhihadin Islamik, kundër vendbanimeve izraelite pranë Gazës më 7 tetor të vitit 2023.
Ofensiva izraelite në Gaza, tani afër përvjetorit të saj të parë, ka rezultuar në mbi 137 mijë viktima palestineze.
Nasrallah deklaroi hapjen e një “fronti në Libanin jugor për të mbështetur rezistencën palestineze”, në disa fjalime duke u zotuar se përpjekja do të mbetet aktive derisa të përfundojë lufta në Gaza.
Vrasja e tij vjen pasi Franca dhe SHBA-ja rrisin përpjekjet për të ndërmjetësuar një armëpushim të përkohshëm 21-ditor midis Izraelit dhe Hezbollahut, me synimin për t’i hapur rrugën zgjidhjes diplomatike në të dy frontet në Liban dhe Gaza.
İran önce Hamas’ı sattı.
Şimd de Hizbullah’ı sattı.Önce İsmail Haniye’yi,
Sonra Nasrallah’ı sattı.Bunun başka açıklaması yok.
İran;
Cumhurbaşkanı öldürüldü, hiç bir şey yapamadı.İsmail Haniye’yi Tahran’a davet etti, Haniye şehit edildi. Hiç bir şey yapmadı.
Peki;… pic.twitter.com/FzEAjk0V0R
— İbrahim Karagül (@ibrahimkaragul) September 27, 2024
