Shefi i politikës së jashtme të BE-së kërkoi shmangien e ndërhyrjes së mëtejshme ushtarake në Liban, duke paralajmëruar se përshkallëzimi i mëtejshëm do të përkeqësonte në mënyrë dramatike situatën në rajon, transmeton Anadolu.
Komentet e Josep Borrellit erdhën pas një takimi të jashtëzakonshëm të ministrave të jashtëm të BE-së përmes një video-konference të thirrur këtë mëngjes për të diskutuar përshkallëzimin aktual në Liban, ku raporte të shumta sugjerojnë se një sulm tokësor i Izraelit është afër.
“Çdo ndërhyrje e mëtejshme ushtarake do të përkeqësonte në mënyrë dramatike situatën dhe duhet të shmanget”, tha Borrell. “Jemi shumë të shqetësuar për rrezikun e kësaj situate të mëtejshme të konfliktit … dhe u bëjmë thirrje të gjitha palëve në rajon të tregojnë përmbajtje në interes të shpërshkallëzimit”, shtoi kryediplomati evropian.
“Armët tani duhet të heshtin dhe zëri i diplomacisë duhet të flasë dhe të dëgjohet”, apeloi ai.
Që nga 23 shtatori, Izraeli ka kryer sulme masive ajrore kundër atyre që i quan objektiva të Hezbollahut në gjithë Libanin, duke vrarë më shumë se 960 njerëz dhe duke plagosur mbi 2.770 të tjerë, sipas Ministrisë libaneze të Shëndetësisë.
Disa liderë të Hezbollahut janë vrarë nga sulmet, duke përfshirë liderin e saj Hassan Nasrallah.
Hezbollahu dhe Izraeli janë përfshirë në luftë ndërkufitare që nga fillimi i luftës së Izraelit në Gaza, e cila ka vrarë afro 41.600 njerëz, kryesisht gra dhe fëmijë, pas një sulmi ndërkufitar nga grupi palestinez Hamas më 7 tetor të vitit të kaluar.
Komuniteti ndërkombëtar ka paralajmëruar se sulmet izraelite në Liban mund ta përshkallëzojnë konfliktin e Gazës në një luftë më të gjerë rajonale.
