Italia ka paraqitur një dekret të ri që synon rregullimin e emigracionit, duke adresuar hyrjet e ligjshme dhe të parregullta, transmeton Anadolu.
Siç raporton transmetuesi publik ‘Rainews’, dekreti u miratua gjatë një mbledhjeje të kabinetit qeveritar dhe ai fokusohet në nevojat për fuqi punëtore emigrante, veçanërisht në sektorët e turizmit dhe bujqësisë, si dhe trajton çështje më të gjera të emigracionit.
Ministri italian i Punëve të Jashtme, Antonio Tajani, ndau detaje mbi dekretin, i cili lejon kërkesën që misionet diplomatike italiane të njoftojnë aplikantët për refuzimin e vizave. Dekreti gjithashtu paraqet regjistrimin e detyrueshëm të gjurmëve të gishtave për shtetasit e huaj që aplikojnë për një vizë italiane dhe imponon një kontroll më të ashpër ndaj aplikantëve nga vende si Pakistani, Bangladeshi dhe Sri Lanka.
Dekreti gjithashtu lejon 10 mijë leje për kujdestarët, në përputhje me nevojat e popullsisë së moshuar të Italisë dhe u siguron emigrantëve që humbasin punën e tyre në bujqësi një afat 60-ditor për të siguruar një punësim të ri.
Kjo rregullore e sapo miratuar gjithashtu kërkon që anijet e shpëtimit të emigrantëve të raportojnë menjëherë incidentet në det tek autoritetet italiane, si dhe u jep zyrtarëve të drejtën të inspektojnë telefonat celular të azilkërkuesve për të verifikuar identitetin dhe kombësinë e tyre.
