Pavarësisht armëpushimit që pritej të lehtësonte hyrjen e ndihmave humanitare në Gaza, kufizimet ndaj kamionëve që transportojnë ushqime dhe ndihma të tjera – veçanërisht atyre të lidhura me UNRWA-n – vazhdojnë të mbeten në fuqi, ka deklaruar Tamara Alrifai, drejtoresha e komunikimit të agjencisë.
Sipas Alrifai-t, UNRWA po i nënshtrohet “dyfish më shumë kontrollit dhe kufizimeve sesa agjencitë e tjera”, megjithëse ajo është agjencia më e madhe që operon në terren. Ajo tha se UNRWA ka furnizime të mjaftueshme për të mbushur 6,000 kamionë me ndihma nga depot e saj në Egjipt dhe Jordani.
Edhe numri i kufizuar i pikave të kalimit ka krijuar radhë të gjata kamionësh që presin të hyjnë në Gaza. Për më tepër, Izraeli vazhdon të ndalojë shumë artikuj duke i kategorizuar si “me përdorim të dyfishtë”, duke pretenduar se mund të shfrytëzohen për qëllime ushtarake.
“Gjatë kontrolleve, Izraeli heq shumë artikuj që janë jashtëzakonisht të nevojshëm, sidomos tani në kushtet e dimrit,” tha Alrifai. /mesazhi
