Raporton nga Damasku, Siri – Ayman Oghanna, Aljazeera
Armëpushimi i menjëhershëm i arritur së fundmi mund të shihet si një fitore e qartë për Damaskun dhe aleatin e tij, Turqinë.
Çështja kryesore me të cilën përballej qeveria siriane dhe që çoi në përplasjet e fundit ishte dështimi për të integruar në mënyrë paqësore Forcat Demokratike Siriane (SDF), të udhëhequra nga kurdët, në institucionet shtetërore të Sirisë.
Që në muajin mars ishte arritur një marrëveshje mes Damaskut dhe SDF-së, e cila parashikonte integrimin e luftëtarëve të SDF-së në strukturat e forcave qeveritare, me një afat deri në fund të vitit 2025. Nëse SDF do t’i ishte përmbajtur këtij afati, sot do të ndodhej në një pozicion shumë më të fortë.
Marrëveshja e marsit parashikonte krijimin e tre divizioneve brenda ushtrisë siriane, të cilat do të ishin nën kontroll të përbashkët të SDF-së dhe Damaskut. Megjithatë, detajet e armëpushimit të ri tregojnë se Ministria siriane e Mbrojtjes do të ketë tani integrimin e plotë të të gjitha strukturave të SDF-së, si dhe komandën dhe kontrollin mbi këto forca.
Kjo përbën një fitore të qartë për Damaskun dhe Turqinë.
Turqia e sheh SDF-në si degën siriane të PKK-së, një organizatë me të cilën Ankaraja është në luftë që nga viti 1984. Si pjesë e marrëveshjes së armëpushimit, është parashikuar që SDF të dëbojë elementët e PKK-së jashtë kufijve të Sirisë.
Gjatë pak më shumë se 10 ditëve të fundit, qeveria siriane ka ndërmarrë një ofensivë të shpejtë, duke marrë kontrollin e plotë mbi qytetin e Aleppos, të gjithë provincën e Aleppos dhe duke avancuar drejt Raqqas. Tashmë, qytete si Raqqa, Hasakah dhe Deir ez-Zor pritet të kalojnë nën kontrollin e plotë të qeverisë, me institucionet civile nën administrimin e Damaskut.
Ky zhvillim është pikërisht ajo që qeveria siriane kishte synuar dhe, sipas vëzhguesve, strategjia e saj ka rezultuar tejet e suksesshme. /mesazhi
