Departamenti amerikan i Shtetit njoftoi sot rifillimin e operacioneve në Ambasadën e SHBA-së në Karakas, duke e quajtur këtë një “kapitull të ri” në angazhimin diplomatik me Venezuelën, transmeton Anadolu.
“Sot, po rifillojmë zyrtarisht operacionet në Ambasadën e SHBA-së në Karakas, duke shënuar një kapitull të ri në praninë tonë diplomatike në Venezuelë”, thuhet në një deklaratë të departamentit.
Sipas deklaratës, ambasadorja Laura F. Dogu mbërriti në Karakas në janar si e ngarkuar me punë për të udhëhequr përpjekjet në terren, me një ekip që po punon për të rikthyer funksionimin e kompleksit të ambasadës dhe për t’u përgatitur për “rikthimin e plotë të personelit” dhe rifillimin eventual të shërbimeve konsullore.
Ambasada e SHBA-së në Karakas ishte mbyllur në mars të vitit 2019, pasi administrata e presidentit Donald Trump njohu liderin opozitar Juan Guaido si president të përkohshëm të Venezuelës, duke e refuzuar rizgjedhjen e Nicolas Maduros në vitin 2018 si të paligjshme.
Që atëherë, misioni në Kolumbinë fqinje kishte menaxhuar përgjegjësitë diplomatike të SHBA-së.
Rifillimi i operacioneve vjen ndërsa Nicolas Maduro mbetet në paraburgim në SHBA pas kapjes së tij gjatë një operacioni ushtarak amerikan në Karakas në fillim të janarit.
Një gjykatës federal javën e kaluar refuzoi të rrëzojë akuzat për narkoterrorizëm dhe trafik droge kundër Maduros dhe bashkëshortes së tij, Cilia Flores, ndërsa të dy vazhdojnë të mbahen në paraburgim në New York pasi janë shprehur të pafajshëm, pa u caktuar ende një datë gjyqi.
