Somalia po përballet me një krizë gjithnjë e më të rëndë urie, ndërsa thatësira e vazhdueshme ka detyruar mbi 500 mijë njerëz të largohen nga shtëpitë e tyre vetëm gjatë këtij viti.
Sipas të dhënave humanitare, mbi 90 për qind e zhvendosjeve janë shkaktuar nga thatësira, ndërkohë që vendi tashmë numëron rreth 3.3 milionë persona të zhvendosur. Dështimi i reshjeve sezonale ka shkatërruar të korrat, ka vrarë bagëtinë dhe ka përkeqësuar varfërinë në zonat rurale.
Familjet e zhvendosura po përballen me rrezik të lartë urie. Shumë prej tyre kanë ecur me ditë të tëra, duke u ushqyer me bimë të egra, për të arritur në kampet e zhvendosjes, ku shpesh nuk gjejnë ndihmën e nevojshme.
Një grua 40-vjeçare, e cila është detyruar të largohet pesë herë nga shtëpia e saj, tregon se nuk ka më asgjë për të ushqyer familjen. “Kjo është hera e pestë që largohem dhe ende përballem me thatësirën,” tha ajo.
Ndërkohë, financimi për ndihma humanitare ka rënë ndjeshëm. Vetëm 14 për qind e fondeve të kërkuara janë siguruar deri tani, duke lënë shumë komunitete pa mbështetje.
Organizatat paralajmërojnë se reshjet e fundit sezonale nuk mjaftojnë për të rikuperuar dëmet e shkaktuara nga vitet e njëpasnjëshme të thatësirës, ndërsa nevojat për ndihmë urgjente mbeten të mëdha. /mesazhi
