Gruaja që tenton të thotë të vërtetën e një realiteti në një vend në luftë
Guvernatorja e Bankës Qendrore të Rusisë Elvira Nabiullina deklaroi se kursimet e qytetarëve rusë dhe burimet e brendshme të kapitalit janë bërë pothuajse e vetmja mënyrë për të financuar ekonominë, pasi sanksionet perëndimore bllokuan aksesin në tregjet ndërkombëtare.
Duke folur në Samitin Alfa, Nabiullina kujtoi se para vitit 2022, kompanitë ruse kishin akses në burime të huaja financimi, duke përfshirë kursimet e qytetarëve të Evropës dhe Shteteve të Bashkuara.
“Kompanitë tona ishin në gjendje t’i përdornin këto fonde me norma interesi relativisht të ulëta, sepse inflacioni dhe normat e interesit në Perëndim ishin të ulëta”, tha ajo.
Sipas saj, sektori i orientuar drejt eksportit në veçanti përdori kredi të tilla për të rritur prodhimin e mallrave të destinuara për tregjet e huaja. Megjithatë, pas vendosjes së sanksioneve, theksoi ajo, burimet globale të kapitalit nuk janë më të disponueshme për Rusinë.
“Sot, kursimet botërore janë të paarritshme për ne. Praktikisht i vetmi burim financimi janë kursimet ruse, me inflacion të lartë dhe norma të larta interesi”, theksoi Nabiullina, sipas The Moscow Times.
Nabiullina paralajmëroi gjithashtu për një mungesë serioze të fuqisë punëtore, duke deklaruar se një situatë e tillë nuk është regjistruar ende në historinë moderne të Rusisë.
“Specifika e situatës aktuale është gjendja e tregut të punës. Në historinë moderne ruse, ne nuk kemi jetuar kurrë në kushte të një mungese të tillë të fuqisë punëtore. Kjo nuk ka ndodhur kurrë në historinë moderne dhe ndikon në situatën e përgjithshme ekonomike”, theksoi ajo. /tesheshi
