Gjendja në zonën përreth Liqenit të Badovcit po paraqet shqetësim serioz për mjedisin dhe sigurinë e ujit të pijshëm në Kosovë, pasi raportohen sërish sasi të mëdha mbeturinash në afërsi të digës.
Organizata “Ta pastrojmë Kosovën” ka ngritur alarmin për përkeqësimin e situatës, duke publikuar pamje që tregojnë ndotje të përsëritur në një nga burimet kryesore të furnizimit me ujë për kryeqytetin dhe zonat përreth.
Sipas organizatës, pavarësisht aksioneve të mëparshme të pastrimit të realizuara me pjesëmarrjen e qytetarëve dhe institucioneve, mbeturinat janë rikthyer në të njëjtën zonë, duke e bërë problemin të përsëritur dhe të pazgjidhur.
Përfaqësuesit e saj theksojnë se situata nuk mund të menaxhohet vetëm përmes iniciativave vullnetare, por kërkon ndërhyrje institucionale, kontrolle më të rrepta dhe masa ndëshkuese ndaj ndotësve.
Organizata ka bërë thirrje për veprime urgjente për mbrojtjen e liqenit, duke paralajmëruar se vazhdimi i kësaj gjendjeje mund të rrezikojë cilësinë e ujit dhe ekosistemin e zonës.
