Një gjykatë në Damask dënoi sot me vdekje Maher al-Assadin, vëllain e ish-presidentit Bashar al-Assad dhe shtatë ish-zyrtarë të sigurisë, përfshirë ish-shefin e sigurisë në provincën Daraa, Atef Najib, transmeton Anadolu.
Gjyqtari Al-Aryan i Gjykatës së Katërt Penale tha se Maher, i cili është i arratisur, u dënua për vrasje me paramendim dhe torturë që çuan në vdekje, raportoi agjencia e lajmeve SANA. Gjykata dënoi gjithashtu Najibin, kushëri i Assadit, me vdekje me akuzat për vrasje, torturë dhe nxitje për vrasje.
Gjykata tha se Najib, ish-kreu i Degës së Sigurisë Politike në Daraa, ishte i përfshirë në marrjen në pyetje të të paraburgosurve pas shpërthimit të protestave në provincën jugperëndimore dhe në drejtimin e një fushate sigurie kundër civilëve në zonë.
“Veprat që i atribuohen Atef Najibit, sipas hetimeve dhe deklaratave të dëshmitarëve, janë krime kundër njerëzimit”, tha gjyqtari.
Gjykata dënoi gjithashtu gjashtë persona të tjerë me vdekje në mungesë në të njëjtin gjyq.
