Grupi Huthi i Jemenit pretendoi të martën se sulmet me raketa dhe dronë që synonin vendet ushtarake në Marib në Jemenin qendror dhe qytetin bregdetar Mokha lanë dhjetëra njerëz të vrarë ose të plagosur, transmeton Anadolu.
Zëdhënësi ushtarak i grupit Huthi, Yahya Saree tha se grupi lëshoi një numër të madh raketash balistike dhe dronësh në dislokimet ushtarake, depot e armëve dhe qendrat komanduese në Mokha dhe kampin ushtarak Tadawin në provincën Marib.
Në një deklaratë të transmetuar nga agjencia e lajmeve Saba e drejtuar nga Huthit, Saree tha se forcat e synuara ishin të lidhura me Arabinë Saudite. Ai tha se sulmet goditën objektivat e tyre dhe lanë “dhjetëra të vrarë dhe të plagosur”, përfshirë sauditë.
Nuk kishte asnjë koment të menjëhershëm nga Arabia Saudite, e cila pohon se nuk ka forca brenda Jemenit dhe thotë se roli i saj është i kufizuar në mbështetjen e forcave të rreshtuara me qeverinë e njohur ndërkombëtarisht dhe sigurimin e kufijve të saj.
Forcat e Rezistencës Kombëtare të Jemenit, të cilat janë në linjë me qeverinë e njohur ndërkombëtarisht thanë të martën se Huthit lëshuan 10 raketa dhe katër dronë përgjatë bregut perëndimor të vendit që nga mëngjesi.
Forcat thanë se mbrojtja e tyre ajrore iu përgjigj sulmeve dhe rrëzoi një dron të ngarkuar me eksploziv.
Jemeni ka qenë në një qetësi relative që nga prilli i vitit 2022 pas gati 12 vitesh luftë midis forcave qeveritare të mbështetura nga një koalicion i udhëhequr nga Arabia Saudite dhe grupit Huthi i mbështetur nga Irani, i cili pushtoi kryeqytetin Sana dhe pjesë të mëdha të vendit në vitin 2014.
Që nga fundi i vitit 2023, pas fillimit të luftës së Izraelit në Rripin e Gazës, grupi Huthi është përfshirë gjithnjë e më shumë në armiqësitë rajonale, duke nisur sulmet ndaj Izraelit dhe anijet tregtare në Detin e Kuq. Luftimet e ripërtëritura kohët e fundit kanë ngritur frikën e një rikthimi të konfliktit në shkallë të plotë në Jemen.
