Grupi jemenas Huthi ka njoftuar se 12 pjesëtarë të tij, përfshirë katër oficerë, janë vrarë mes përshkallëzimit të vazhdueshëm ushtarak me forcat qeveritare jemenase, transmeton Anadolu.
Televizioni Al-Masirah, i drejtuar nga Huthit, raportoi se ceremonitë mortore për 12 pjesëtarët u mbajtën në kryeqytetin Sana dhe në provincat Saada, Hajjah, Al-Mahwit, Dhamar dhe Amran.
Raportohet se katër nga të varrosurit ishin oficerë, përfshirë një me gradën gjeneral brigade.
Mediat nuk dhanë detaje se kur, ku apo në çfarë rrethanash u vranë ata.
Të enjten, ushtria jemenase tha se kishte kryer 81 operacione kundër Huthive brenda 24 orëve, gjatë të cilave komandantë në terren dhe luftëtarë të grupit ishin “neutralizuar”, pa dhënë shifra për viktimat.
Deri vonë, Jemeni kishte përjetuar një qetësi relative që nga viti 2022, pas gati 12 vitesh lufte mes forcave qeveritare të mbështetura nga një koalicion i udhëhequr nga Arabia Saudite dhe Huthive të mbështetur nga Irani, të cilët morën kontrollin e Sanas dhe pjesëve të mëdha të vendit në vitin 2014.
