Ish-kryeministri izraelit, Naftali Bennett, ka deklaruar se Izraeli ka “humbur SHBA-në” dhe pjesën tjetër të botës, duke paralajmëruar se pozita ndërkombëtare e vendit ka arritur një nivel të ulët të paprecedentë, transmeton Anadolu.
Duke folur në Konferencën për Konceptin e Sigurisë së Izraelit në Tel Aviv, Bennett tha: “Kemi humbur SHBA-në, kemi humbur botën”.
Deklaratat e tij u transmetuan në kanalin zyrtar të Bennettit në YouTube.
“Jemi në pikën më të tmerrshme dhe më të ulët të pozitës së Izraelit në botë që nga themelimi i shtetit”, shtoi ai.
Bennett akuzoi qeverinë e kryeministrit Benjamin Netanyahu se ka dështuar të arrijë fitore në disa fronte.
“Qeveria e Netanyahut nuk di si të fitojë askund, as në Gaza, as në Liban. Ata nuk po fitojnë askund”, tha ai.
Ish-kryeministri gjithashtu argumentoi se Izraelit i mungon një institucion efektiv për t’iu kundërvënë atyre që ai i përshkroi si fushata ndikimi që synojnë vendin.
Bennett është shfaqur si një rival i rëndësishëm i Netanyahut përpara zgjedhjeve parlamentare në Izrael, duke kritikuar vazhdimisht menaxhimin e luftës në Gaza nga qeveria dhe mënyrën se si ajo ka trajtuar marrëdhëniet me aleatët e Izraelit.
Izraeli është përballur me kritika dhe izolim ndërkombëtar në rritje për shkak të luftës së tij në Rripin e Gazës, ku ushtria izraelite ka vrarë dhjetëra mijëra palestinezë, ka zhvendosur shumicën e popullsisë dhe ka shkatërruar pjesë të mëdha të enklavës që nga tetori i vitit 2023.
