Kryeministri izraelit, Benjamin Netanyahu, është zotuar se do të pengojë krijimin e një shteti palestinez në Gaza ose në Bregun Perëndimor të pushtuar për aq kohë sa të jetë në detyrë, transmeton Anadolu.
Deklaratat e tij erdhën në përgjigje të Mansour Abbasit, kreut të Listës së Bashkuar Arabe, i cili tha se Palestina tashmë ekziston si shtet dhe njihet nga shumica e botës.
Abbas gjithashtu i bëri thirrje Izraelit dhe SHBA-së që ta njohin Palestinën.
“Për sa kohë që unë jam kryeministër, nuk do të ketë një shtet palestinez të kontrolluar nga Irani, as në Gaza dhe as në Jude e Samari”, tha Netanyahu, duke përdorur termin biblik për territorin e pushtuar.
Duke folur më herët në konferencën e përgjithshme të partisë së tij në qytetin arab Tayibe, Abbas tha se partia e tij synon paqen mes Izraelit dhe Palestinës.
“Shteti i Palestinës ekziston dhe bota e njeh atë”, tha Abbas, duke u bërë thirrje Washingtonit dhe Tel Avivit që gjithashtu ta njohin.
Deklaratat e Netanyahut erdhën përpara zgjedhjeve për Knessetin, të planifikuara për më 27 tetor, ndërsa sondazhet e opinionit tregojnë se partia e tij Likud dhe partnerët e saj të koalicionit nuk arrijnë 61 vendet e nevojshme për të formuar qeverinë.
Likud, e cila aktualisht ka 32 vende, ka shënuar një rënie të ndjeshme në sondazhet e fundit, ndërsa një sondazh i publikuar të premten e nxori atë me 20 vende.
Një sondazh i transmetuesit Channel 13, i publikuar më 19 gusht, parashikoi se Likud i Netanyahut dhe aleatët e tij të ekstremit të djathtë dhe ultraortodoksë do të siguronin së bashku 51 vende, 10 më pak se shumica parlamentare.
