Kryediplomati kinez Wang Yi i tha homologut të tij gjerman Johann Wadephul në një telefonatë se bashkëpunimi më i ngushtë dhe reciprokisht i dobishëm u shërben interesave të të dy vendeve dhe është “zgjedhja e duhur”, sipas Ministrisë së Jashtme kineze, transmeton Anadolu.
“Kina dhe Bashkimi Evropian janë partnerë strategjikë gjithëpërfshirës dhe ata nuk duhet të përfshihen në një luftë tregtare”, i tha Wang homologut të tij gjerman, thuhej në një deklaratë të ministrisë të hënën.
“Kina ka mbrojtur vazhdimisht që të dyja palët të takohen me njëra-tjetrën në gjysmë të rrugës dhe të gjejnë zgjidhje për shqetësimet e tyre përkatëse përmes dialogut dhe konsultimit”, shtoi ai.
Wang i bëri thirrje Gjermanisë që të mbajë qasje racionale dhe pragmatike dhe të luajë rol konstruktiv brenda BE-së. Ai tha se Berlini duhet të mbështesë tregtinë e lirë dhe të kundërshtojë masat proteksioniste.
Ndërkohë, Ministria e Jashtme gjermane tha se Wang dhe Wadephul ranë dakord se një ekonomi e qëndrueshme globale është në interes të Kinës, Gjermanisë dhe Evropës.
“Marrëdhëniet tregtare duhet të bazohen në rregulla të drejta dhe në një fushë reale të barabartë loje”, tha ministria në një postim në platformën amerikane të mediave sociale X.
Diskutimet mbuluan edhe situatat në Iran dhe Ukrainë si dhe në Tajvan, të cilin Kina e pretendon si pjesë të territorit të saj.
Wang i kërkoi Gjermanisë të ndërmarrë hapa konkretë për të mbrojtur marrëdhëniet kinezo-gjermane dhe për të ndihmuar në ruajtjen e paqes dhe stabilitetit në ngushticën e Tajvanit. Ai tha se kjo do të krijonte kushtet e nevojshme për shkëmbime dypalëshe të nivelit të lartë.
