Senati i Spanjës ka refuzuar një traktat miqësie dhe bashkëpunimi me Francën, në ditën e parë të vizitës shtetërore të presidentit francez Emmanuel Macron në Madrid, transmeton Anadolu.
Transmetuesi publik spanjoll RTVE raportoi se marrëveshja, e miratuar më parë nga dhoma e ulët, mori 106 vota pro dhe 142 kundër, ndërsa një senator abstenoi. Në Senat, Partia Popullore (PP) e opozitës ka shumicën absolute.
Traktati u nënshkrua nga Macron dhe kryeministri spanjoll Pedro Sanchez në Barcelonë në janar të vitit 2023 dhe synonte të thellonte bashkëpunimin dhe të krijonte një kuadër për konsultime të rregullta mes dy qeverive.
PP kishte kundërshtuar një dispozitë që lejonte një ministër nga secili vend të merrte pjesë në mbledhjet e Këshillit të Ministrave të vendit tjetër.
Qeveritë më vonë sqaruan se pjesëmarrja do të bëhej në takime të posaçme dhe jo në mbledhjet zyrtare të Kabinetit. Gjykata Kushtetuese e Spanjës vendosi javën e kaluar se kjo dispozitë nuk binte ndesh me Kushtetutën.
Më herët, Mbreti Felipe VI dhe Mbretëresha Letizia pritën presidentin Macron dhe bashkëshorten e tij, Brigitte Macron, me nderime ushtarake në Pallatin Mbretëror në Madrid.
Macron pritet të takohet me Sanchez nesër. Dy liderët pritet të diskutojnë marrëdhëniet dypalëshe gjatë vizitës, e cila është vizita e parë shtetërore në Spanjë nga një president francez që nga viti 2009.
