Mjegulla e dendur e shkaktuar nga zjarret në pyje dhe toka bujqësore ka penguar fluturimet në Indonezi ndërsa dhjetëra zona në Malajzinë fqinje regjistruan cilësi të pashëndetshme të ajrit, transmeton Anadolu.
Sipas agjencisë shtetërore indoneziane të lajmeve Antara, dy fluturime nga Xhakarta nuk arritën të uleshin në Aeroportin Sultan Syarif Kasim II në Pekanbaru, në provincën Riau, pasi dukshmëria ra në rreth 600 metra.
Sipas autoriteteve të aeroportit, fluturimi JT292 i Lion Air u kthye në Xhakartë ndërsa fluturimi QG936 i Citilink u devijua drejt Batamit, në Ishujt Riau. Media lokale Detik raportoi se fluturimi i Lion Air u kthye në orën 6:44 të mëngjesit me kohën lokale.
Sipas Agjencisë së Meteorologjisë, Klimatologjisë dhe Gjeofizikës të Indonezisë (BMKG), mjegulla e tymit mbuloi gjithashtu Batamin, duke ulur dukshmërinë në 2-3 kilometra. BMKG tha se tymi nga zjarret në pyje dhe toka në pjesë të tjera të Sumatrës dhe Kalimantanit ishte përhapur drejt Batamit dhe zonave përreth.
Në Malajzi, sipas gazetës lokale “The Star”, e cila citoi Sistemin e Menaxhimit të Indeksit të Ndotjes së Ajrit të vendit, 36 zona regjistruan nivele të pashëndetshme të Indeksit të Ndotjes së Ajrit deri në orën 10:00 me kohën lokale.
Johan Setia në Selangor regjistroi nivelin më të lartë, 191, i ndjekur nga Cheras në Kuala Lumpur dhe Nilai në Negeri Sembilan, me nga 189. Autoritetet malajziane thanë se Indonezia kishte pranuar ofertën e Kuala Lumpurit për të ndihmuar në operacionet për shuarjen e zjarreve, përfshirë hedhjen e ujit nga ajri dhe përdorimin e avionëve amfibë.
Malajzia dhe Indonezia po koordinojnë vendosjen e mjeteve për shuarjen e zjarreve përmes kanaleve diplomatike.
