Kryeministri i zgjedhur i Izraelit, Benjamin Netanyahu, ka telefonuar presidentin e Turqisë, Recep Tayyip Erdoğan, për t’i shprehur ngushëllimet e tij për sulmin terrorist të së dielës në Stamboll, si pasojë e të cilit humbën jetën gjashtë persona dhe 81 të tjerë u plagosën, transmeton Anadolu Agency (AA).
Drejtoria Turke e Komunikimeve njoftoi se presidenti Erdoğan, duke falënderuar Netanyahu-n për thirrjen e tij ngushëlluese, ka shprehur trishtimin e tij për incidentin në Bregun Perëndimor dy ditë më parë.
Të martën, tre kolonë izraelitë u vranë dhe tre të tjerë u plagosën në një sulm brenda një vendbanimi në veri të Bregut Perëndimor.
Erdoğan gjithashtu uroi që rezultatet e zgjedhjeve në Izrael të jenë “të favorshme për vendin dhe rajonin”.
Në fillim të këtij muaji, ish-kryeministri Netanyahu dhe blloku i tij i krahut të djathtë fituan 64 vende në parlamentin izraelit prej 120 vendesh, duke siguruar një shumicë të plotë për të formuar qeverinë.
Duke theksuar fillimin e një epoke të re në marrëdhëniet Turqi -Izrael falë vullnetit të fortë të shfaqur nga të dyja palët, presidenti Erdoğan tha se “Është në interesin e përbashkët të Turqisë dhe Izraelit të ruajnë marrëdhëniet duke respektuar ndjeshmërinë mbi bazën e interesave të ndërsjella dhe për t’i forcuar ato mbi një bazë të qëndrueshme”.
Netanyahu, nga ana e tij, tha se përpjekjet e ndërmjetësimit të Turqisë midis Rusisë dhe Ukrainës janë “të rëndësishme për botën”.
Më 22 korrik, Turqia, Kombet e Bashkuara (OKB), Rusia dhe Ukraina nënshkruan një marrëveshje në Stamboll për të rifilluar eksportet e drithërave nga tre porte ukrainase të Detit të Zi, që u ndërprenë në muajin shkurt për shkak të luftës së Rusisë në Ukrainë.
Sot, para skadimit të marrëveshjes më 19 nëntor, marrëveshja historike u zgjat edhe për 120 ditë të tjera.
Sipas OKB-së, që nga 1 gushti janë eksportuar mbi 10 milionë tonë drithëra nga Ukraina.
Muajve të fundit, marrëdhëniet Izrael-Turqi janë përmirësuar, me të dy vendet në muajin gusht që u pajtuan për rivendosjen e lidhjeve të plota diplomatike. Që atëherë, të dy vendet kanë riemëruar ambasadorët e tyre.
