Delegacioni diplomatik, i përbërë nga përfaqësues të vendeve anëtare të Bashkimit Evropian (BE), vizitoi Xhaminë al-Aksa në Kudsin Lindor të pushtuar dhe u takua me zyrtarë të Administratës së Fondacioneve Islame të Kudsit, transmeton Anadolu Agency (AA).
Në vizitë morën pjesë diplomatët dhe shefat e misioneve të BE-së, Britanisë së Madhe, Norvegjisë, Australisë, Meksikës, Argjentinës, Brazilit dhe Kilit.
Përfaqësuesit e misioneve të huaja u mirëpritën nga drejtori i Administratës së Fondacioneve Islame Al-Quds, Azzam al-Hatib, i cili është përgjegjës për menaxhimin e Mesxhid al-Aksa dhe me drejtorin e Fondacionit të Mesxhid al-Aksa, Shejh Omer al-Kisvani.
Delegacioni dhe zyrtarët e Mesxhid al-Aksa mbajtën një takim me dyer të mbyllura në bibliotekën e Xhamisë së Shenjtë.
“Dëshirojmë të mbizotërojë sensi i përbashkët”
Në një deklaratë të shkurtër për gazetarët pas takimit, drejtori i Administratës së Fondacioneve Islame të Kudsit, Al-Hatib tha se ata e informuan delegacionin diplomatik për të gjitha ngjarjet në Xhaminë Al-Aksa.
“(Diplomatët) shprehën mbështetjen e tyre të fortë për statusin e vendeve të shenjta, përfshirë Mesxhid al-Aksa-n, nën kujdesin e Mbretërisë së Jordanisë. Ne i falënderojmë ata shumë për ardhjen”, tha Al-Hatib.
Një zyrtar i Mesxhid al-Aksës, në përgjigje të një pyetjeje në lidhje me politikat e krahut të djathtë ekstrem të qeverisë që mori detyrën së fundmi në Izrael dhe veçanërisht veprimet provokuese të ministrit të Sigurisë Kombëtare Itamar Ben-Gvir kundër Mesxhid Al-Aksës tha: Urojmë që Al-Aksa të kthehet në statusin e saj historik dhe ligjor para vitit 2000 dhe të mbetet ashtu siç ishte”.
Ndërkohë, grupi diplomatik pritej të jepte deklaratë të përbashkët për media në përfundim të vizitës, ajo u anulua pa specifikuar arsyen.
Bastisja provokuese e Ben-Gvirit në Mesxhid Al-Aksa
Ministri izraelit i Sigurisë Kombëtare, Itamar Ben-Gvir, i njohur për veprimet e tij provokuese, më 3 janar bastisi Mesxhidi Al-Aksanë, nën mbrojtjen intensive të policisë izraelite.
Lideri i Partisë së Fuqisë Hebraike, Ben-Gvir i njohur për politikat e tij raciste dhe diskriminuese ndaj palestinezëve, u bë ministri i parë izraelit në detyrë që hyri në Xhaminë e Shenjtë pas 5 viteve.
Përveç qeverisë palestineze, shumë vende dhe organizata ndërkombëtare, përfshirë Türkiye-n, publikuan një mesazh reagimi dhe “mbrojtje të ‘status quo’-s”.
Sipas marrëveshjes së paqes të nënshkruar midis Izraelit dhe Jordanisë më 26 tetor të vitit 1994, Mesxhid Al-Aksa është nën kujdesin e Administratës së Fondacioneve Islame të Kudsit, e cila është e lidhur me Ministrinë jordaneze të Fondacioneve, Çështjeve Islame dhe Shenjtërisë.
