Diplomatët dhe shtetasit nga Shtetet e Bashkuara, Britania e Madhe, Franca dhe Kina do të evakuohen nga Sudani në rrugë ajrore, ndërsa luftimet vazhdojnë, thuhet në një deklaratë nga ushtria sudaneze të shtunën, shkruan BBC.
Shefi i ushtrisë, Fattah al-Burhan, ra dakord për të lehtësuar dhe siguruar evakuimin e tyre në orët e ardhshme.
Shefi i ushtrisë po lufton ashpër për pushtet me udhëheqësin e një fraksioni rival paraushtarak, Forcat e Mbështetjes së Shpejtë (RSF).
Qindra njerëz janë vrarë në një javë luftime në të gjithë vendin.
Planet e mëparshme për evakuimin e shtetasve të huaj nuk janë zbatuar për shkak të frikës së sigurisë.
Një deklaratë nga ushtria ka thënë se shtetasit dhe diplomatët britanikë, amerikanë, francezë dhe kinezë do të evakuohen nga ajri në bordin e avionëve të transportit ushtarak nga kryeqyteti, Khartoum.
Arabia Saudite ka njoftuar gjithashtu se po organizon evakuimin e qytetarëve sauditë dhe shtetasve të vendeve “vëllazërore” nga Sudani. Ushtria sudaneze ka thënë se misioni diplomatik i Arabisë Saudite tashmë ishte evakuuar.
Konflikti ka hyrë në javën e tij të dytë pavarësisht se të dyja palët – ushtria dhe RSF – ranë dakord për një armëpushim tre-ditor për të shënuar festën myslimane të Fitër Bajramit.
Aeroporti ndërkombëtar i Khartoumit është mbyllur për shkak të dhunës, me ambasadat e huaja – përfshirë SHBA-në dhe Britaninë e Madhe – që nuk kanë mundur të sigurojnë evakuimin e qytetarëve të vet. /koha
