Të dërguarit e vendeve të Bashkimit Evropian (BE) kanë votuar për të përjashtuar për një vit taksat e importit për produktet ukrainase, pavarësisht kundërshtimit të vendeve anëtare lindore të bllokut, transmeton Anadolu.
Presidenca suedeze me Këshillin Evropian njoftoi se ambasadorët e BE-së mbështetën një rinovim të “rregullores për liberalizimin e përkohshëm të tregtisë”, duke plotësuar koncesionet tregtare sipas Marrëveshjes së Asociimit BE-Ukrainë.
Vendimi zgjat edhe për një vit tjetër preferencën e dhënë ndaj Ukrainës majin e kaluar, e cila heq detyrimet për të gjitha mallrat e importuara, përfshirë produktet industriale dhe bujqësore.
Qasja e lirë e Ukrainës në tregun e BE-së, tha presidenca suedeze, do të mbështesë “ekonominë e vendit pas pushtimit në shkallë të plotë të Ukrainës nga Rusia”.
Miratimi erdhi pavarësisht ndalimeve nga Polonia, Hungaria, Sllovakia dhe Bullgaria, të cilët bllokuan zgjatjen dhe ndaluan në mënyrë të njëanshme hyrjen e drithërave dhe dërgesave të tjera ushqimore nga Ukraina.
Këto vende argumentojnë se hapat janë të nevojshëm për të mbrojtur fermerët dhe produktet e tyre.
Komisioni Evropian si masë kompromisi premtoi 100 milionë euro mbështetje për fermerët dhe një përjashtim për qeveritë që të ndalojnë shitjen e produkteve bujqësore ukrainase nëse heqin embargon për hyrjen dhe lejojnë mallrat ukrainase në vendet e tjera të BE-së.
Sipas ligjit të BE-së, vendet anëtare të BE-së nuk janë të lira të marrin vendime për politikat e tyre tregtare dhe të tregut, të cilat vendosen nga krahu ekzekutiv.
