Azerbajxhani ka bërë të ditur se në bisedimet me Armeninë në Washington është arritur përparim në disa pikë të një traktati të ardhshëm të paqes midis dy vendeve, transmeton Anadolu.
Ministria e Punëve të Jashtme e Azerbajxhanit njoftoi se megjithatë palët nuk gjetën një bazë të përbashkët për disa çështje kyçe.
“Ministrat dhe anëtarët e delegacionit të tyre shoqërues arritën marrëveshje të ndërsjellë për disa pika të projekt-traktatit dypalësh për paqen dhe vendosjen e marrëdhënieve ndër-shtetërore, por në të njëjtën kohë pranuan se qëndrimet për disa çështje kyçe ende dallojnë”, tha ministria azerbajxhanase.
Të mërkurën, Shtëpia e Bardhë ishte nikoqire e shefave të diplomacisë të Azerbajxhanit dhe Armenisë, të cilët u angazhuan në një seancë 4-ditore negociuese që nga e diela.
Këshilltari i Sigurisë Kombëtare të SHBA-së, Jake Sullivan, në rrjetet sociale përshëndeti “progresin që Armenia dhe Azerbajxhani kanë bërë në bisedime”, duke inkurajuar “vazhdimin e dialogut”.
Marrëdhëniet midis dy ish-republikave sovjetike kanë qenë të tensionuara që nga viti 1991, kur ushtria armene pushtoi Karabakun, i cili në nivel ndërkombëtar njihet si pjesë e Azerbajxhanit.
Pjesa më e madhe e territorit u çlirua nga Baku gjatë një lufte në vjeshtën e vitit 2020, e cila përfundoi pas një marrëveshje të paqes të ndërmjetësuar nga Rusia dhe hapi derën e normalizimit.
