Një zyrtar ukrainas tha se presidenti Volodymyr Zelenskyy “mohon” se forcat ruse kanë pushtuar qytetin strategjik Bakhmut në lindje të Ukrainës, duke sqaruar një deklaratë që iu atribuua gabimisht atij përpara takimit me homologun amerikan, transmeton Anadolu.
Sekretari presidencial i shtypit Serhii Nykyforov shkroi në Facebook se përgjigjja e Zelenskyyt “Unë mendoj se jo” për gazetarët në Japoni ishte në përgjigje të një pyetje të tyre kur thanë se “Rusët pohojnë se kanë marrë Bakhmutin”.
“Në këtë mënyrë, presidenti mohoi kapjen e Bakhmutit”, tha Nykyforov.
Më herët, agjencia japoneze e lajmeve Kyodo raportoi se Zelenskyy ka thënë: “Unë mendoj se jo”, kur u pyet nga një gazetar në Hiroshima nëse Bakhmuti kontrollohej ende nga Ukraina.
Udhëheqësi ukrainas ndodhet aktualisht në Japoni, ku mori pjesë në samitin e G7-s dhe u takua me liderët botërorë, duke përfshirë homologët e tij të SHBA-së, Koresë së Jugut, Francës dhe BE-së, si dhe kryeministrat e Indisë, Italisë dhe Britanisë, si dhe kancelarin gjerman Olaf Scholz.
Komenti i Zelenskyyt erdhi një ditë pasi Ministria ruse e Mbrojtjes pretendoi se forcat ruse kanë marrë kontrollin e plotë në Bakhmut.
Ndërkohë, në një konferencë sot në mëngjes, Shtabi i Përgjithshëm i Ukrainës tha se beteja për qytetin e Bakhmutit vazhdon.
