Presidenti francez, Emmanuel Macron, ka akuzuar Rusinë për “përdorimin e ushqimit si armë” me pezullimin e marrëveshjes së drithërave, teksa komentoi vendimin e Moskës për t’u tërhequr nga Iniciativa e Kokrrave të Detit të Zi një ditë më parë, raporton Anadolu.
Duke folur para gazetarëve në Samitin BE-Komuniteti i Shteteve të Amerikës Latine dhe Karaibeve (CELAC) në Bruksel, Macron theksoi se vendimi i njëanshëm nga Rusia do të ketë pasoja domethënëse për vendet e Lindjes së Mesme, Afrikës dhe Azisë që mbështeten në marrëveshjen.
“Ata që dyshojnë në sinqeritetin e zotit Putin dhe përkushtimin e tij ndaj të mirave të përbashkëta, përgjigja është shumë e qartë… ai vendosi të përdor ushqimin si armë dhe mendoj se ky është një gabim i madh”, tha presidenti francez.
Dje, Kremlini njoftoi se pezullon marrëveshjen, duke deklaruar se pjesa ruse e marrëveshjes nuk u zbatua.
Marrëveshja, e nënshkruar fillimisht në korrik të vitit të kaluar në Istanbul nga Türkiye, Kombet e Bashkuara (OKB), Rusia dhe Ukraina, kishte për qëllim fillimin e eksporteve të drithërave nga portet ukrainase, të cilat ishin ndaluar si rezultat i luftës ruso-ukrainase që filloi në shkurt të vitit 2022.
Më 18 maj, marrëveshja u zgjat për 60 ditë të tjera, duke siguruar vazhdimin e eksporteve të drithërave sipas marrëveshjes dhe duke shmangur një krizë ushqimore në botë.
Liderët e BE-së dhe të CELAC-it janë mbledhur për të diskutuar temat e biznesit dhe zhvillimit në Bruksel në kuadër të një samiti dy-ditor BE-CELAC.
