Sipas mediave izraelite, Egjipti ka refuzuar vendosjen e një force të përbashkët egjiptiano-izraelite në aksin Filadelfia pranë kufirit me Rripin e Gazës, transmeton Anadolu.
Siç raporton transmetuesi publik izraelite KAN, “bombardimi i fundit izraelit i aksit Filadelfia ka zemëruar Kajron, veçanërisht pasi zona është subjekt i marrëveshjeve dypalëshe që kërkon leje paraprake para se të kryejë ndonjë veprim ushtarak”.
Zyrtarët egjiptianë janë të shqetësuar se çdo operacion ushtarak izraelit në zonë do të ketë një ndikim të drejtpërdrejtë në situatën në Gadishullin Sinai.
“Kajro përsëriti vazhdimisht se nuk kishte tunele në këtë zonë”, tha KAN.
Sipas transmetuesit, e njëjta çështje u ngrit gjatë diskutimeve të fundit të mbajtura nga drejtori i agjencisë Shin Bet, Ronen Bar, me zyrtarët egjiptianë.
Deri më tani nuk ka asnjë koment nga autoritetet egjiptiane apo izraelite mbi raportin në fjalë.
Aksi Filadelfia është një rrit i ngushtë brenda territorit të Rripit të Gazës, që shtrihet 14 kilometra përgjatë kufirit midis enklavës dhe Egjiptit.
Dje, radioja e ushtrisë izraelite raportoi se Tel Avivi po planifikon të ndërtojë një mur nëntokësor anti-tunelit pranë kufirit midis Rripit të Gazës dhe Egjiptit.
Izraeli beson se tunelet nëntokësore kanë qenë kyçe për operacionet e Hamasit në fushën e betejës.
Izraeli ka nisur sulme ajrore dhe tokësore në Rripin e Gazës në shenjë hakmarrjeje për sulmin e Hamasit, sipas autoriteteve shëndetësore në enklavën bregdetare, duke vrarë të paktën 19.453 palestinezë, kryesisht fëmijë dhe gra.
