Asamblea e Madhe Kombëtare e Turqisë (TBMM) të martën pritet të diskutojë protokollin e anëtarësimit të Suedisë në NATO, raporton Anadolu.
Në një deklaratë të Komitetit të Punëve të Jashtme të parlamentit turk thuhet se gjatë seancës së të martës do të diskutohen rreth 10 projektligje që kanë të bëjnë me miratimin e marrëveshjeve ndërkombëtare.
Presidenti i Turqisë, Recep Tayyip Erdoğan, nënshkroi protokollin për pranimin e Suedisë në NATO dhe e dorëzoi atë në parlament në tetor.
Finlanda dhe Suedia aplikuan për anëtarësim në NATO menjëherë pasi Rusia nisi luftën në Ukrainë në shkurt 2022.
Turqia miratoi anëtarësimin e Finlandës, por njoftoi se ishte në pritje që Suedia t’i përmbahej një memorandumi trepalësh të nënshkruar në qershor 2022 për të adresuar shqetësimet e sigurisë së Ankarasë.
