Dy gazetarë të tjerë palestinezë u vranë në sulmet izraelite në Rripin e Gazës sot, duke e çuar numrin e gazetarëve të vdekur që nga 7 tetori në 109, thanë autoritetet e enklavës, transmeton Anadolu.
Në një deklaratë, zyra mediale e qeverisë identifikoi dy viktimat si Hamza Wael Al-Dahdouh, djali i shefit të zyrës së Al-Jazeeras në Gaza Wael Al-Dahdouh, dhe Mustafa Thuraya, të cilët humbën jetën nga një bombë izraelite në makinën e tyre në qytetin Khan Younis në jug të Rripit të Gazës.
Zyra denoncoi “në termat më të fortë këtë krim të urryer” të kryer nga “ushtria pushtuese izraelite kundër gazetarëve”.
Izraeli synon “të frikësojë gazetarët në një përpjekje të dështuar për të errësuar të vërtetën dhe për të parandaluar mbulimin mediatik”, shtoi ajo.
Zyra për media u bëri thirrje “të gjitha sindikatave të shtypit, organeve të të drejtave të njeriut dhe atyre ligjore që të dënojnë këtë krim dhe të denoncojnë kryerjen e përsëritur të tij nga okupacioni”.
Ajo gjithashtu bëri thirrje për presion mbi “okupacionin për të ndaluar luftën gjenocidale kundër popullit tonë të pambrojtur në Rripin e Gazës”.
Që nga sulmi ndërkufitar i Hamasit më 7 tetor, Izraeli ka vazhduar sulmet intensive në Rripin e Gazës, duke vrarë të paktën 22.722 palestinezë dhe duke plagosur 58.166, sipas autoriteteve lokale shëndetësore.
Autoritetet izraelite kanë pretenduar se në sulmin e Hamasit janë vrarë rreth 1.200 izraelitë.
Sulmet izraelite e kanë lënë Gazën në gërmadha, me 60 për qind të infrastrukturës të dëmtuar ose shkatërruar dhe gati 2 milionë banorë të zhvendosur, të cilët përballen me mungesë akute të ushqimit, ujit të pastër dhe ilaçeve.
