Metoda “Wim Hof” e ushtrimeve të frymëmarrjes dhe banjave me akull mund të ndihmojë sistemin imunitar të trupit, por nevojiten më shumë kërkime për të kuptuar nëse ajo mund të rrisë performancën e ushtrimeve dhe shëndetin e përgjithshëm, sipas shkencëtarëve.
Sipas një përmbledhjeje tregohet se frymëmarrja e kontrolluar dhe terapia e ftohjes mund të zvogëlojnë inflamacionin kronik. Inflamacioni, i cili ndodh kur sistemi imunitar i trupit shkon në mbingarkesë, shoqërohet me shumë probleme shëndetësore duke përfshirë sëmundjet e zemrës, kancerin, diabetin, artritin reumatoid, astmën, Alzheimerin dhe sëmundjet kronike të veshkave.
Por aktualisht ka zbulime të përziera mbi efektin e metodës “Wim Hof” në aftësitë atletike të një personi, thanë studiuesit nga Universiteti i Warwick. Ekipi paralajmëroi gjithashtu se rezultatet, të publikuara në revistën “Plos One”, tregojnë se nevojiten kërkime të mëtejshme për të kuptuar nëse metoda ofron të gjitha përfitimet që pretendon themeluesi i saj, atleti ekstrem holandez Wim Hof.
Doktori Omar Almahayni, nga Shkolla e Mjekësisë “Warwick” në Universitetin e Warwick, tha: “Rishikimi ynë sistematik nënvizon nevojën për hetime të mëtejshme mbi efektet e metodës “Wim Hof” mbi stresin, inflamacionin dhe shëndetin e përgjithshëm, duke ofruar njohuri të vlefshme për potencialin e saj si një plotësues”.
Almahayni shtoi se provat e deritanishme të cilat pretendojnë se kjo metodë funksionon duhet të trajtohen me kujdes.
Hof pretendon se praktikimi i metodës së tij mund të ndihmojë në përmirësimin e mirëqenies, rritjen e sistemit imunitar, rritjen e niveleve të energjisë, reduktimin e stresit, rritjen e qartësisë mendore dhe fokusin dhe rritjen e performancës sportive, shkruan Mirror.
