Sipas një sondazhi të kryer së fundmi, shumica e gjermanëve nuk e miratojnë ofensivën ushtarake të Izraelit në Rripin e Gazës, transmeton Anadolu.
Sondazhi zbuloi se rreth 61 për qind e gjermanëve thanë se janë kundër veprimeve ushtarake të Izraelit në Rripin e Gazës, ndërsa vetëm 33 për qind shprehën mbështetje për ofensivën.
Sondazhi u ngarkua nga revista javore gjermane Stern dhe u krye nga instituti kërkimor Forsa në datat 30-31 maj.
Kujtojmë se në një sondazh të kryer në muajin nëntor, pas sulmit të Hamasit më 7 tetor të vitit 2023, 62 për qind e gjermanëve thanë se mbështesin aksionin ushtarak të Izraelit në Gaza.
Në atë kohë, vetëm 31 për qind e gjermanëve ishin kundër ofensivës ushtarake të Izraelit.
Izraeli ka zhvilluar një ofensivë ushtarake vdekjeprurëse në Gaza që nga sulmi ndërkufitar i tetorit nga Hamasi. Të paktën 36.500 palestinezë, kryesisht gra dhe fëmijë, janë vrarë që atëherë në Gaza dhe rreth 83 mijë të tjerë janë plagosur.
Pothuajse tetë muaj pas luftës izraelite, zona të gjera të Gazës janë kthyer në rrënoja mes një bllokade gjymtuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila në vendimin e fundit të saj ka urdhëruar Tel Avivin të ndalojë menjëherë operacionin ushtarak në qytetin jugor Rafah, ku mbi 1 milion palestinezë kanë kërkuar strehim.
