Zëvendëspresidentja e SHBA-së, Kamala Harris, kritikoi kandidatin e Partisë Republikane, Donald Trump, për komentet e tij për përkatësinë e saj etnike, duke i cilësuar si “përçarëse dhe mosrespektuese”, transmeton Anadolu.
Harris mbajti një fjalim në një aktivitet drejtuar një komuniteti të studenteve kryesisht me ngjyrë në Huston.
Duke reaguar ndaj fjalëve të Trump për përkatësinë e saj etnike se “Ajo dëshiron të njihet si me ngjyrë edhe pse është indiane”, Harris argumentoi se kundërshtari i saj ishte “përçarës dhe mosrespektues”.
Harris tha se amerikanët meritojnë më mirë, duke shtuar: “Populli amerikan meriton një udhëheqës që thotë të vërtetën dhe nuk përgjigjet me zemërim kur përballet me faktet”.
– Trump tha se Schumer është “anëtar i Hamasit”
Nga ana tjetër, Trump, në një fjalim tjetër që bëri pas komenteve të tij për përkatësinë etnike të Harris, për liderin e shumicës në Senat, demokratin Chuck Schumer, tha se “Ai është anëtar krenar i Hamasit”.
Duke kujtuar se Schumer, i cili përshkruhet si një hebre i zgjedhur në postin më të lartë zyrtar në SHBA, nuk i dha dorën kryeministrit izraelit, Benjamin Netanyahu, Trump tha: “Chuck Schumer është bërë palestinez”.
Ish-presidenti i SHBA-së Trump, në fjalimin e tij në konventën e Shoqatës Kombëtare të Gazetarëve me ngjyrë në Chicago, për përkatësinë etnike të Harris kishte thënë: “Ajo ishte gjithmonë me origjinë indiane dhe po promovonte trashëgiminë e saj indiane. Nuk e dija që ishte me ngjyrë deri sa ajo u bë me ngjyrë disa vite më parë, dhe tani dëshiron të njihet si me ngjyrë”.
