Të paktën 16.480 fëmijë palestinezë janë vrarë në sulmet izraelite në Rripin e Gazës që nga 7 tetori i kaluar, raporton Anadolu.
“Të vrarët përfshijnë 115 foshnja”, tha për Anadolu Ismail Thawabteh, i cili drejton zyrën e mediave të qeverisë së Gazës.
Ai tha se 35 fëmijë palestinezë kanë vdekur nga kequshqyerja dhe dehidratimi në mes të një bllokade të fortë izraelite në enklavë.
“Të paktën 3.500 fëmijë në Gaza po përballen me rrezikun e vdekjes mes mungesës së ushqimit dhe kequshqyerjes, nën kufizimet izraelite për dërgimin e ushqimit në Gaza”, paralajmëroi ai, duke shtuar:
“Më shumë se 17.000 fëmijë kanë humbur prindërit e tyre ose të paktën njërin prej prindërve pasi ata u vranë brutalisht nga forcat pushtuese izraelite që nga 7 tetori”.
Për muaj të tërë, agjencitë ndërkombëtare dhe të OKB-së kanë paralajmëruar nga një ndikim negativ psikologjik tek fëmijët palestinezë për shkak të ofensivës shkatërruese të Izraelit në Gaza.
Izraeli, duke shpërfillur një rezolutë të Këshillit të Sigurimit të OKB-së që kërkon armëpushim të menjëhershëm, ka vazhduar ofensivën e tij brutale të vazhdueshme në Gaza që nga sulmi i 7 tetorit të vitit të kaluar nga grupi i rezistencës palestineze, Hamas.
Sulmet izraelite që atëherë kanë vrarë më shumë se 40.000 njerëz, kryesisht gra dhe fëmijë, dhe kanë plagosur mbi 92.700, sipas autoriteteve lokale shëndetësore.
Më shumë se 10 muaj pas fillimit të sulmeve izraelite, pjesë të mëdha të Gazës qëndrojnë në gërmadha, krahas një bllokade gjymtuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila e ka urdhëruar atë të ndalojë menjëherë operacionin e tij ushtarak në qytetin jugor Rafah, ku më shumë se 1 milion palestinezë kishin kërkuar strehim nga lufta përpara se të pushtohej më 6 maj.
