Joe Biden ka thënë se vendimi historik që ish-presidentët kanë imunitet shkel parimin “nuk ka mbretër në Amerikë” dhe do të thotë se komandanti i përgjithshëm tani mund të “injorojë ligjin”.
Ai foli pasi Gjykata e Lartë e SHBA vendosi se ekziston imuniteti nga ndjekja penale për veprimet zyrtare gjatë kohës që ishte në detyrë, por jo për ato jozyrtare, transmeton Telegrafi.
“Secili prej nesh është i barabartë përpara ligjit. Askush nuk është mbi ligjin, madje as presidenti i Shteteve të Bashkuara,” tha Biden.
Vendimi është një fitore për Donald Trump, i cili akuzohet për përpjekje të paligjshme për të përmbysur humbjen e tij në zgjedhjet e vitit 2020.
“Unë e di se do të respektoj kufijtë e pushtetit presidencial siç kam bërë për tre vjet e gjysmë”, shtoi Biden.
“Por çdo president, përfshirë Donald Trump, tani do të jetë i lirë të injorojë ligjin”, shtoi presidenti amerikan.
Gjykata e Lartë nuk vendosi mbi meritat e çështjes së Trump, por e ktheu atë në një gjykatë më të ulët për të vendosur se si do të zbatohej vendimi.
Tani duhet të vendosë nëse Trump po vepronte zyrtarisht apo privatisht në lidhje me akuzat.
Presidenti Biden tha se vendimi i së hënës nënkuptonte gjithashtu se ish-presidenti tani kishte “shumë pak gjasa” për të dalë në gjyq, përpara se votuesit amerikanë të thonë përsëri fjalën e tyre pas katër muajsh.
“Është një dëmtim i tmerrshëm për njerëzit në këtë komb”, tha ai.
Nëse Trump bëhet përsëri president në nëntor, ai mund të jetë në gjendje të përdorë fuqitë e tij për të hedhur poshtë akuzat kundër tij.
Ai më parë festoi vendimin, duke postuar në internet: “Fitore e madhe për Kushtetutën dhe demokracinë tonë. Krenar që jemi amerikanë”.
Të tre gjyqtarët liberalë kundërshtuan të gjithë opinionin e shumicës – me Sonia Sotomayor që paralajmëroi se ishte një hap i rrezikshëm për demokracinë.
Ajo tha se ishte një “tallje” me parimin se “asnjë burrë nuk është mbi ligjin”.
“Në çdo përdorim të pushtetit zyrtar, presidenti tani është një mbret mbi ligjin”, shkroi ajo. /Telegrafi/
The post Biden thotë se vendimi i Gjykatës së Lartë për imunitetin do të thotë se presidentët mund të ‘injorojnë ligjin’ – ndërsa Trump feston ‘fitoren e madhe’ first appeared on Radio Televizioni Iliria.
