Washingtoni nuk po kërkon nga Arabia Saudite të bëjë një zgjedhje midis lidhjeve me SHBA-në ose me Kinën, tha Sekretari amerikan i Shtetit, Antony Blinken, raporton Anadolu.
“Ne nuk po i kërkojmë askujt të zgjedhë midis Shteteve të Bashkuara dhe Kinës”, tha Blinken në një konferencë të përbashkët shtypi të enjten me homologun e tij saudit Faisal bin Farhan.
“Ne thjesht po përpiqemi të tregojmë përfitimet e partneritetit tonë dhe axhendën afirmative që sjellim”, tha ai.
“Shtetet e Bashkuara mbeten partneri numër një për shumicën e vendeve në rajon”, shtoi ai, duke përfunduar vizitën tre-ditore në mbretëri dhe duke përsëritur lidhjet e forta SHBA-Arabia Saudite.
Ministri i Jashtëm saudit, nga ana e tij, pohoi “partneritetin e fortë të sigurisë me SHBA-në”, por gjithashtu theksoi se Riadi ka një partneritet të fortë me Kinën, “partnerin e saj më të madh tregtar”.
Ai shtoi se Arabia Saudite është “e aftë të ketë partneritete të shumta” me vende të ndryshme.
Në mars, Kina ndërmjetësoi me sukses midis Riadit dhe Teheranit, e cila rezultoi me rifillimin e marrëdhënieve diplomatike dhe rihapjen e ambasadave, duke i dhënë fund ndërprerjes shtatë vjeçare të marrëdhënieve midis dy vendeve fqinje.
Duke iu përgjigjur deklaratës të Blinken, zëdhënësi i Ministrisë së Jashtme kineze Wang Wenbin tha se Pekini “shpreson që të gjitha institucionet diplomatike amerikane të zbatojnë plotësisht premtimin e sekretarit amerikan të shtetit dhe të mbajnë një qëndrim të hapur ndaj marrëdhënieve të vendeve të tjera me Kinën”.
Wang, duke folur para gazetarëve në kryeqytetin kinez, megjithatë i kërkoi SHBA-së që “të ndalojë së frenuari kompanitë kineze ose të detyrojë aleatët e SHBA-së të heqin dorë nga bashkëpunimi me Kinën dhe të ndalojnë përhapjen e dezinformatave mbi ‘kurthin e borxhit’ në lidhje me Kinën”, sipas të përditshmes kineze Global Times.
