Një burim egjiptian ka zbuluar se Izraeli nuk është i përgatitur të dakordësohet për një armëpushim në Rripin e Gazës, transmeton Anadolu.
Sipas kanalit ‘Cairo News’, burimi i nivelit të lartë, i cili foli në kushte anonimiteti, tha se “pozicioni izraelit nuk është ende gati për një marrëveshje armëpushimi dhe shkëmbimi pengjesh”, por nuk dha arsye specifike për hezitimin e Tel Avivit.
Më herët gjatë ditës, sipas raporteve të mediave, qeveria izraelite i udhëzoi negociatorët të rifillojnë bisedimet për një armëpushim dhe shkëmbim pengjesh në Gaza.
Pavarësisht pranimit nga Hamasi të një propozimi të ndërmjetësuar nga Egjipti dhe Katari për një armëpushim dhe shkëmbim pengjesh më 6 maj, kryeministri izraelit, Benjamin Netanyahu, akuzoi grupin e rezistencës palestineze për përpjekje për të “sabotuar” operacionet ushtarake izraelite në Rafah.
Netanyahu pohoi se pozicioni i Hamasit nuk përmbush kërkesat thelbësore të Izraelit.
Njëkohësisht, Izraeli nisi një operacion ushtarak në Rafah dhe më pas mori kontrollin e anës palestineze të pikës kufitare Rafah më 7 maj, duke parandaluar hyrjen e ndihmave humanitare.
Izraeli ka vazhduar ofensivën brutale në Gaza që nga 7 tetori i vitit të kaluar, pavarësisht një rezolute të Këshillit të Sigurimit të OKB-së që kërkon një armëpushim të menjëhershëm.
Të paktën 35.800 palestinezë janë vrarë, shumica dërrmuese e të cilëve kanë qenë gra dhe fëmijë, si dhe mbi 80.200 të tjerë janë plagosur që nga tetori i vitit të kaluar.
Më shumë se shtatë muaj pas luftës izraelite, zona të gjera të Gazës janë kthyer në rrënoja mes një bllokade gjymtuese të ushqimit, ujit të pastër dhe ilaçeve.
Izraeli akuzohet për “gjenocid” në Gjykatën Ndërkombëtare të Drejtësisë, e cila ka urdhëruar Tel Avivin të sigurojë që forcat e tij të mos kryejnë akte gjenocidi dhe të marrin masa për të garantuar ofrimin e ndihmës humanitare për civilët në Gaza.
