Ministri i Punëve të Jashtme të Turqisë, Mevlüt Çavuşoğlu, diskutoi zgjerimin e NATO-s me shefin e aleancës, si dhe me homologun e tij finlandez, raporton Anadolu Agency (AA).
Çavuşoğlu zhvilloi biseda të ndara telefonike me kreun e NATO-s, Jens Stoltenberg, si dhe me ministrin e Jashtëm finlandez, Pekka Haavisto.
Finlanda aplikoi zyrtarisht për anëtarësim në NATO së bashku me Suedinë në maj të vitit të kaluar, një vendim i nxitur nga lufta e Rusisë kundër Ukrainës, e cila filloi më 24 shkurt 2022.
Anëtarësimi i të dy vendeve në NATO duhet ratifikuar nga 30 vendet anëtare të aleancës.
Mirëpo Turqia, një anëtare e NATO-s për më shumë se 70 vjet, shprehu kundërshtime, duke akuzuar të dy vendet se tolerojnë dhe madje mbështesin grupet terroriste, duke përfshirë PKK-në dhe Organizatën Terroriste FETO, grupi që qëndron pas përpjekjes së mposhtur për grusht shteti të 15 korrikut 2016 në Turqi.
Në qershor të vitit të kaluar, Turqia dhe dy vendet nordike nënshkruan një memorandum në një samit të NATO-s për të adresuar shqetësimet legjitime të sigurisë së Ankarasë, duke hapur rrugën për anëtarësimin e tyre përfundimtar në aleancë.
Në memorandum, Suedia dhe Finlanda ranë dakord të mos ofrojnë mbështetje për PKK-në, degët e saj, si dhe për FETO-n, të parandalojnë të gjitha aktivitetet e grupeve terroriste, të ekstradojnë të dyshuarit për terrorizëm, të miratojnë legjislacionin e ri për të ndëshkuar krimet terroriste dhe t’i japin fund të gjitha embargove të armëve midis tre vendeve.
