Ministri i Punëve të Jashtme i Turqisë, Mevlüt Çavuşoğlu, tha se Organizata e Shteteve Turke shprehu solidaritet të fuqishëm pas tërmeteve të muajit të kaluar që goditën rajonin jugor të vendit, raporton Anadolu.
“Bota e madhe turke u pikëllua shumë për vëllezërit e humbur në tërmet. Megjithatë, ju nuk ndatë vetëm pikëllimin tonë. Ju keni shfaqur shembullin më të mirë të diplomacisë solidare”, tha Çavuşoğlu në fjalimin hyrës gjatë takimit të Këshillit të Ministrave të Jashtëm të Organizatës së Shteteve Turke të mbajtur në kryeqytetin Ankara.
Takimi erdhi në prag të samitit të jashtëzakonshëm të liderëve të organizatës në të cilin do të diskutohet tema e Menaxhimit të Fatkeqësive-Emergjencave dhe Ndihmës Humanitare.
“Si kolegë të mi, ju personalisht keni treguar mbështetjen tuaj. Ju dërguat ekipet e kërkim-shpëtimit dhe spitalet fushore”, tha Çavuşoğlu.
Më 6 shkurt, pjesa jugore e Turqisë u godit nga dy tërmete me magnitudë 7,7 dhe 7,6, duke shkaktuar vdekjen e 48.448 personave.
Më shumë se 13,5 milionë njerëz në Türkiye janë prekur nga tërmetet shkatërruese, si dhe shumë të tjerë në pjesën veriore të Sirisë.
Çavuşoğlu tha se organizata po zgjeron bashkëpunimin në fusha të reja.
“Ne së bashku kemi zbatuar projekte energjetike në shkallë të gjerë si tubacioni i naftës Baku-Tbilisi-Ceyhan dhe TANAP. Ne duhet të rrisim bashkëpunimin që TANAP të transportojë gaz natyror shtesë nga rajoni i Kaspikut në tregun ndërkombëtar”, shtoi ai.
Kryediplomati turk tha se në këtë periudhë, kur Azia do të dalë sërish në plan të parë, organizata duhet të rrisë peshën e “Korridorit të Mesëm” në tregtinë globale.
Duke iu referuar çështjeve rajonale, Çavuşoğlu tha se lufta në Ukrainë dhe zhvillimet në Afganistan janë të lidhura ngushtë me organizatën.
“Ne duhet të forcojmë unitetin tonë. Fakti që Republika Turke e Qipros Veriore (TRNC) është mes nesh si një vëzhgues është shumë kuptimplotë në këtë drejtim”, shtoi ai.
Njohja e barazisë sovrane, të drejtave dhe statusit të barabartë ndërkombëtar të popullit turk qipriot dhe heqja e izolimit dhe kufizimeve të cilave TRNC i nënshtrohet, duhet të jetë qëllimi i përbashkët, theksoi Çavuşoğlu.
Organizata e Shteteve Turke, e quajtur më parë Këshilli Turk, është një organizatë ndërkombëtare që përfshin vende të pavarura turke që punojnë së bashku për të ngritur marrëdhëniet dhe bashkimin mes tyre.
Anëtarët e saj janë Türkiye, Azerbajxhani, Kazakistani, Kirgistani dhe Uzbekistani, ndërsa Hungaria, Turkmenistani dhe Republika Turke e Qipros Veriore kanë statusin e vëzhguesit.
