Kryeministri Kurti kishte bërë thirrje që të votohej Aleanca Progresive e Socialistëve dhe Demokratëve në zgjedhjet e Parlamentit Evropian. Mirëpo fitues dolën nga Partia Popullore Evropiane që janë në ekstremin e djathtë e që po konsiderohet se mund të ketë efekte negative në raport me lidershipin kosovar.
Përmes një video-mesazhi iu drejtuar bashkatdhetarëve që jetojnë në vendet Evropiane.
Kryeministri, Albin Kurti u bëri thirrje atyre që të votojnë në zgjedhjet për Parlamentin Evropian që u mbajtën më 9 qershor.
Ai shprehu përkrahjen e tij ndaj Aleancës Progresive të Socialistëve dhe Demokratëve.
Megjithatë, partia që simpatizonte Kurti zuri vendin e dytë në këtë zgjedhje evropiane.
Sipas rezultateve, Partia Popullore Evropiane e cila mbledh partitë e qendrës së djathtë do të ketë 181 deputetë.
E ish-ambasadori kosovar, Blerim Canaj thekson se kjo mund të ketë ndikime edhe për Kosovën.
Sipas tij, kjo mund të lidhet direkt edhe me anëtarësimin e vendit në Këshillin e Evropës.
“Nuk e di pastaj se me këto parti a do të mund të arrihet momentumi i kërkuar për t’u anëtarësuar aty,kjo është vetëm një shembull. Por gjithmonë megjithatë aty kemi të bëjmë me një diplomaci parlamentare kjo është fjala te Parlamenti Evropian dhe natyrisht që e kanë njëfarë ndikimi edhe partitë tjetra por jam i sigurt që kjo do të na e determinojë zhvillimet në Kosovë sidomos ato që kanë të bëjnë me politikën e jashtme”, ka thënë Canaj.
E njohësi i çështjeve politike, Arbnor Sadiku thotë se politika ndërkombëtare në raport me Kosovën nuk do të ndryshojë, por vetëm me lidershipin aktual.
“Natyrisht pasojat mund të jenë në mënyrë indirekte për kryeministrin Kurti dhe partinë e tij Lëvizjen Vetëvendosje jo në kuptimin që t’i humb zgjedhjet por të ketë një lloj mosbashkëpunimi me të dhe si me thënë prishje të imazhit të Kosovës për shkak të mosvizitave të krerëve kryesorë të diplomacisë evropiane dhe atyre të Amerikës dhe të njëjtën kohë prishje të raporteve mes krerëve të institucioneve të Kosovës dhe atyre ndërkombëtare”, shprehet Sadiku.
Partia Popullore Evropiane (EPP), Aleanca progresive e Socialistëve dhe Demokratëve si dhe Liberalët konsiderohen si forcat kryesore pro-evropiane, së bashku fituan 398 mandate.
