Gjykata Themelore në Prishtinë, ka shpallur aktgjykim lirues lidhur me veprën penale krim i organizuar ndaj ish-deputetit Ukë Rugova, ish-ministrit të Ministrisë së Kulturës, Rinisë dhe Sportit, Astrit Haraqija, Qefser Bahollit dhe Izet Beqirit, ndërsa aktgjykim dënues për armëmbajtje pa leje ndaj Rugovës, Bahollit dhe Beqirit.
Ata ngarkoheshin se duke vepruar si grup kriminal, për qëllime të përfitimit material, i kanë pajisur qytetarët në mënyrë të jashtëligjshme me viza shengen nga Ambasada Italiane në Prishtinë.
Aktgjykimi ndaj të akuzuarve në këtë rast, u shpall të enjten nga kryetarja e trupit gjykues, Fatime Dërmaku, raporton “Betimi për Drejtësi“.
Gjykatësja Dërmaku tha se të akuzuarit Ukë Rugova, Izet Beqiri, Astrit Haraqija dhe Qefser Baholli, konform nenit 363, pika 1.3 të Kodit të Procedurës Penale, lirohen nga akuza në pikën 1, 2, 4 dhe 5, pasi nuk u provua se kanë kryer veprën penale “Krim i organizuar” nga neni 383, par.2 lidhur me veprën penale “Kontrabandim me migrantë” nga neni 170, par.1 dhe 2 të Kodit Penal.
Sipas aktgjykimit, të akuzuarit Rugova, Beqiri dhe Baholli, janë fajtorë për shkak të veprës penale “Mbajtja në pronësi, kontroll ose posedim i paautorizuar i armëve” nga neni 374, par.1 të Kodit Penal.
Për Ukë Rugovën, gjykata ka bërë ricilësimin juridik të veprës penale nga paragrafi 2, në paragrafin 1 të Kodit Penal, për veprën penale “Mbajtja në pronësi, kontroll ose posedim i paautorizuar i armëve”, pasi që të njëjtin e gjeti përgjegjës për posedimin e dy revoleve me dy karikatorë dhe revolen “Zastava” dhe 50 plumba të kalibrit 357, ndërsa e liron nga përgjegjësia penale për 382 fishekë të kalibrit 556, pasi që nga provat e administruara, nuk u vërtetuar se i ka pasur në posedim këta fishekë.
Të akuzuarin Izet Beqiri, gjykata e gjeti penalisht fajtor për posedimin e një arme dhe një karikatori bosh si dhe 16 fishekë, kurse Qefser Bahollin e gjeti penalisht fajtor për posedimin e një pistolete, me karikator dhe 15 fishekë.
Andaj, gjykata në bazë të dispozitave të lartcekura ligjore dhe neneve 4, 21, 38, 39, 40, 42, 43, 69 dhe 70 të Kodit Penal të Republikës së Kosovës si dhe nenit 364, 365 dhe 366 të Kodit të Procedurës Penale, të pandehurve iu shqipton dënim me gjobë.
Ndaj Ukë Rugovës, gjykata shpalli dënim me gjobë në shumën prej 6 mijë euro për armëmbajtje pa leje, kurse ndaj Beqirit dhe Bahollit, dënim me gjobë për secilin veç e veç nga 3 mijë e 500 euro, për të njëjtën vepër penale.
Kurse, për Florjan Petanin është refuzuar akuza, pasi që Prokuroria Speciale ka hequr dorë nga ndjekja penale.
Gjykatësja Dërmaku tha se ankesa ndaj aktgjykimit, sipas Kodit të ri është 30 ditë.
Ndryshe, për të akuzuarin Florjan Petani, prokurorja speciale Florije Shamolli, në seancën e 27 marsit 2027, gjatë fjalës përfundimtare ka kërkuar aktgjykim refuzues, me arsyetimin se për të njëjtin, Gjykata e Romës ka nxjerrë aktgjykim lirues, për të njëjtat vepra penale.
Ndryshe, ky rast gjykohej nga misioni i EULEX-it, por pas përfundimit të mandatit, lënda ishte transferuar të vendorët.
Kjo lëndë, më pas ishte caktuar te gjykatësja Naime Krasniqi-Jashanica, e cila nuk kishte caktuar asnjë seancë në vitin 2018, me arsyen që ky rast nuk ishte prioritet për gjykatën.
Pasi që lënda ishte transferuar tek gjykatësit vendorë, në janar të vitit 2018, përpjekja e parë për mbajtje të seancës ishte bërë pas një viti, përkatësisht në janar të vitit 2019, mirëpo kjo seancë kishte dështuar në mungesë të katër të akuzuarve.
Në seancën fillestare të mbajtur më 30 gusht të vitit 2016, Ukë Rugova dhe të tjerët ishin deklaruar të pafajshëm për akuzat me të cilat ngarkohen. Të pafajshëm ishin deklaruar edhe në seancën e mbajtur më 11 janar të vitit 2017.
Aktakuza e Prokurorisë Speciale të Republikës së Kosovës (PSRK), e ngritur më 16 maj të vitit 2016, e ngarkonte Ukë Rugovën se gjatë periudhës maj 2011 deri në shkurt 2014, ka menaxhuar një grup kriminal duke furnizuar individë me viza shengen të BE-së, nga Ambasada Italiane në Prishtinë. Të gjitha këto viza supozohet se janë marrë në mënyrë të paligjshme nëpërmjet shtrembërimit apo korrupsionit.
Dispozitivi tjetër i aktakuzës ngarkonte Rugovën edhe për veprën penale posedim i paautorizuar i armëve, ku në rezidencën e tij i ishin gjetur një pistoletë dhe dy karikatorë.
Aktakuza që ishte përpiluar nga prokurori Allen Cansick, thekson se Prokuroria Speciale e Republikës së Kosovës ka pranuar nga Prokuroria Italiane në Romë një kopje të dosjes së tyre lidhur me vizat ku përfshihet edhe emri i ish–ambasadorit Italian në Kosovë Michael Giffoni.
Bashkë me Ukë Rugovën në këtë rast janë të akuzuar edhe Izet Beqiri, Florjan Petani, Qefser Baholli, Astrit Haraqija, Fitim Beqiri, Azad Beqiraj, Liridona Beqiri, Kujtim Avdyli, Ragip Gashi, Visar Beqiri Hamza Beqiri, Azem Koskoviku, Edison Idrizaj, Beg Shaqiri, Hasan Shaqiri, Dritëro Voca, Valon Selimi, Fadil Ahmeti dhe Haxhi Islami.
Në këtë rast, Ukë Rugova, Astrit Haraqija, Florjan Petanit, Qefser Bahollit dhe Izet Beqirit u gjykuan ndaras, pas veçimit të procedurës ndaj tyre, pasi sipas ish-gjykatëses së rastit Naime Krasniqi-Jashanica, me këtë formë gjykimi do të ishte më efikas. Pra, rasti ishte ndarë në dy pjesë, ku pesë të akuzuarit e lartpërmendur u gjykuan veçmas nga 15 të akuzuarit tjerë.
Prokuroria pretendon se ky grup, siç e cilëson kriminal, kishte për qëllim sigurimin e përfitimit material në atë mënyrë që qytetarët të pajisen me viza shengen nga Ambasada Italiane në Prishtinë.
