Grupi jemenas Houthi i mbështetur nga Irani njoftoi se kanë sulmuar një anije në Detin e Kuq që po shkonte në Izrael, transmeton Anadolu.
Zëdhënësi ushtarak i Houthive, Yahya Saree, në një deklaratë tha se forcat e tyre të armatosura shënjestruan anijen me kontejnerë “CMA CGM TAGE” që po shkonte drejt porteve të pushtuara palestineze.
Duke deklaruar se ekuipazhi i anijes refuzoi t’u përgjigjej të shtënave paralajmëruese dhe thirrjeve të ndryshme, Saree nuk dha informacione për pasojat e sulmit në anije.
Ai deklaroi se operacioni u krye kundër padrejtësisë ndaj popullit palestinez që po i nënshtrohet bllokadës dhe sulmeve, ndërsa gjithashtu theksoi se sulmet ndaj anijeve izraelite që shkojnë në portet e pushtuara palestineze në Detin e Kuq dhe Gjirin Persik do të vazhdojnë derisa njerëzit në Rripin e Gazës të marrin ushqimin dhe ilaçet që u nevojiten.
Në deklaratën e tij, Saree kërcënoi gjithashtu se çdo sulm amerikan në këtë kontekst nuk do të mbetet pa përgjigje dhe pa u ndëshkuar.
Komanda Qendrore e SHBA-së (CENTCOM) njoftoi në një deklaratë në platformën e mediave sociale “X” këtë mëngjes se Houthit lëshuan dy raketa kundër anijeve në Detin e Kuq nga rajoni nën kontrollin e tyre në Jemen.
