Temperaturat përvëluese po ”vlojnë” në të gjithë Evropën me disa rajone që përballen me temperatura që pritet të rriten mbi 40 gradë Celsius, tha Agjencia Evropiane e Hapësirës.
Akropoli, në kryeqytetin grek të Athinës u mbyll të premten mes orëve 09:00-17:00 GMT për shkak të nxehtësisë ekstreme.
Në mëngjes, një turiste pësoi një goditje të lehtë të nxehtësisë teksa vizitonte Akropolin, pikë referimi arkeologjike të Athinës.
”Ajo u dërgua në spital, por nuk është në rrezik”, thanë shërbimet e urgjencës.
Kushtet e ngjashme mbizotëronin në Qipro.
”Të premten, termometrat në kryeqytetin Nikosia lexuan 43 gradë Celsius”, njoftoi radioja e ishullit.
Në Greqi, pica dhe shërbimet e tjera të shpërndarjes u ndaluan të dërgonin punëtorët e tyre në rrugë gjatë orarit të drekës.
Punonjësit e shtetit u nxitën të punonin nga shtëpia nëse ishte e mundur.
Për më tepër, qytetet dhe bashkitë në të gjithë Greqinë hapën ndërtesa me ajër të kondicionuar për qytetarët që të kërkonin strehim nga vapa përvëluese.
Sipas meteorologëve në Athinë, nuk ka asnjë shenjë të uljes së temperaturave në 35 gradë Celsius, të zakonshme për korrikun.
Nuk ka lehtësim në horizont as për Italinë – pas të ashtuquajturës valë të nxehtë të Cerberus të kësaj jave, të quajtur sipas përbindëshit me tre koka që shfaqet në ferrin e Dantes – meteorologët thanë se do të jetë edhe më e nxehtë javën e ardhshme.
Pjesë të Gjermanisë do të kenë sot temperatura ekstreme.
Sipas Shërbimit Gjerman të Motit (DWD), temperaturat do të rriten deri në 30 gradë Celsius dhe 37 gradë Celsius në rajonet lindore dhe jugore të vendit.
Ekspertët theksuan ndryshimin e klimës.
“Ngjarjet ekstreme të motit, të cilat po ndodhin me frekuencë në rritje në klimën tonë të ngrohjes, kanë ndikime të rëndësishme në shëndetin e njeriut, ekosistemet, ekonomitë, bujqësinë dhe furnizimin me energji dhe ujë”, tha Sekretari i Përgjithshëm i Organizatës Botërore Meteorologjike (WMO) Petteri Taalas.
“Kjo nënvizon urgjencën në rritje për të reduktuar emetimet e gazeve serrë sa më shpejt dhe sa më thellë të jetë e mundur”, shtoi ai.
Në të gjitha vendet e prekura nga vala e të nxehtit, mjekët këshilluan njerëzit të pinë shumë ujë dhe të shmangin alkoolin dhe pijet me sheqer.
Njerëzit gjithashtu duhet të kalojnë sa më pak kohë të jetë e mundur jashtë dhe të përmbahen nga aktivitetet e rënda fizike si vrapimi dhe çiklizmi. /atsh
