Niveli i kërcënimit terrorist në Irlandën e Veriut është rritur nga “i rëndësishëm” në “serioz”, që tregon se ka shumë mundësi të ketë sulm, transmeton Anadolu.
Sekretari britanik për Irlandën e Veriut, Chris Heaton-Harris, në një deklaratë me shkrim në parlament, theksoi se vendimi për ngritjen e nivelit të kërcënimit terrorist në Irlandën e Veriut në “serioz” është marrë nga MI5, shërbimi i brendshëm i inteligjencës.
“MI5 ka rritur nivelin e kërcënimit të terrorizmit lidhur me Irlandën e Veriut nga ‘i rëndësishëm’ (mundësi e sulmit) në ‘serioz’ ( sulm shumë i mundshëm). Publiku duhet të jetë vigjilent, por jo në panik dhe të vazhdojë të ngrejë shqetësimet e tij në Shërbimin e Policisë së Irlandës së Veriut (PSNI)”, tha Heaton-Harris.
Vendimi për të rritur nivelin e kërcënimit terrorist në Irlandën e Veriut erdhi pas një sulmi me armë zjarri ndaj një oficeri policie muajin e kaluar. IRA e Re (Ushtria Republikane Irlandeze) mori përgjegjësinë për sulmin.
Vitin e kaluar, niveli i kërcënimit terrorist në Irlandën e Veriut u ul nga “serioz” (sulm shumë i mundshëm) në “i rëndësishëm” (sulm i mundshëm) 12 vjet më vonë.
Niveli “serioz” tregon një sulm shumë të mundshëm
Mbretëria e Bashkuar ka pesë nivele kërcënimi: “kritik”, “serioz”, “i rëndësishëm”, “i moderuar” dhe “i ulët”.
Niveli “kritik” do të thotë se ka inteligjencë konkrete se një sulm terrorist mund të ndodhë në çdo kohë, ndërsa niveli “serioz” tregon se sulmi është shumë i mundshëm pa një inteligjencë të tillë.
Niveli i kërcënimit përcaktohet nga Qendra e Përbashkët e Analizës së Terrorizmit (JTAC). JTAC, e cila ushtron aktivitetet e saj në kuadër të organit të agjencisë britanike të inteligjencës MI5; përbëhet nga ekspertë kundër terrorizmit që punojnë në polici, qeveri dhe disa institucione sigurie.
Grupet e armatosura në Irlandën e Veriut vazhdojnë të ekzistojnë
Britania ka qenë objektiv i akteve terroriste nga Ushtria Republikane Irlandeze (IRA), e cila luftonte për pavarësinë e Irlandës. Në vitet 1920, ishulli i Irlandës u nda në dysh, ndërsa Irlanda e Veriut vazhdoi të ishte pjesë e Mbretërisë së Bashkuar, ndërsa jugu gradualisht fitoi pavarësinë e tij nën emrin Republika e Irlandës.
Nga fundi i viteve 1960 deri në hyrjen në fuqi të Marrëveshjes së Belfast-it në vitin 1999, Britania e Madhe ishte skena e sulmeve nga organizata terroriste separatiste irlandeze.
Ndërsa IRA gradualisht hodhi armët pas marrëveshjes së paqes, grupe të reja brenda organizatës që donin të përjetësonin dhunën vazhduan veprimet e tyre nën emra të lidhur me IRA.
Në janar 2019, një punëtor i quajtur Ian Ogle u vra nga Shoqata e Mbrojtjes së Ulsterit (UDA), e cila mbron besnikërinë ndaj Anglisë dhe në prill u vra gazetarja Lyra McKee nga IRA e Re.
Gjithashtu në të njëjtin vit, një sulm me bombë u krye para gjykatës në Londonderry në Irlandën e Veriut dhe IRA e Re mori përgjegjësinë për incidentin.
Në rajon, protestantët pro bashkimit, të cilët kundërshtuan rregulloren që kufizonte tregtinë midis Irlandës së Veriut dhe pjesës tjetër të Mbretërisë së Bashkuar, sipas marrëveshjes së Brexit-it të arritur me Bashkimin Evropian (BE) më 29 mars 2021, dolën në rrugë dhe kryen akte të dhune.
