Zëdhënësi i Komisionit Evropian për Euractiv, tha se Marrëveshja e Prespës midis Greqisë dhe Maqedonisë së Veriut duhet të zbatohet nga “të gjitha palët” dhe me “vullnet të mirë”. Kjo vjen pas mosmarrëveshjes së re midis Athinës dhe Shkupit për çështjen e emrit.
Kriza e re diplomatike midis dy vendeve shpërtheu pasi presidentja e re e Maqedonisë së Veriut, Gordana Siljanovska-Davkova, e cila vjen nga partia nacionaliste OBRM-PDUKM, refuzoi të përdorte emrin zyrtar të vendit gjatë inaugurimit të saj më 12 maj.
Davkova e quajti vendin “Maqedoni” në vend të “Maqedonia e Veriut”, emri zyrtar kushtetues pas marrëveshjes së vitit 2018 për ndryshimin e emrit me Greqinë, e njohur ndryshe si Marrëveshja e Prespës.
Incidenti ka ngjallur reagime në të gjithë Evropën dhe Shtetet e Bashkuara, të cilat kanë frikë nga një ringjallje e kontestit, e cila shihet si një plagë e hapur për rajonin e Ballkanit.
Marrëveshja e Prespës i hapi rrugën Maqedonisë së Veriut për anëtarësim në NATO dhe fillimin e negociatave për anëtarësim në BE.
Por mes një krize të re, kryeministri grek ka kërcënuar të vërë veton në rrugën e Maqedonisë së Veriut drejt BE-së nëse Shkupi nuk respekton marrëveshjen për ndryshimin e emrit.
Kreu grek theksoi gjithashtu se tre protokollet e bashkëpunimit në vazhdim, të cilat janë pjesë e Marrëveshjes së Prespës dhe që partia në pushtet i shmangu për shkak të kundërshtimit të disa të linjave të marrëveshjes, nuk do të kalojnë në Kuvend. Telegrafi
The post Komisioni Evropian fton Shkupin dhe Athinën t’i përmbahen marrëveshjes për ndryshimin e emrit first appeared on Radio Televizioni Iliria.
