Letonia ka ndaluar 246 persona të cilët po kalonin ilegalisht nga Bjellorusia fqinje, tha të hënën Roja Kufitare Letoneze.
Sipas Gardës Kufitare, 472 persona u përpoqën të kalonin kufirin e jashtëm të BE-së gjatë tre ditëve të fundit.
“Vetëm dje u ndaluan 246 persona, një shifër rekord brenda 24 orëve”, tha agjencia kufitare e vendit të BE-së dhe NATO-s.
Numri i përgjithshëm i kalimeve të paligjshme të kufirit këtë vit, ka arritur në mbi 7 800, krahasuar me 5 300 vitin e kaluar.
“Lituania pritet të dërgojë 20 roje kufitare në Letoni për të mbështetur fqinjin e saj baltik”, njoftoi agjencia e lajmeve BNS, duke cituar zëvendësministrin e Brendshëm, Arnoldas Abramavicius.
Në Lituani, numri i tentativave të kalimit të paligjshëm të kufirit ka rënë ndjeshëm kohët e fundit.
Një arsye për këtë është gardhi i përhershëm që është ngritur përgjatë kufirit të vendit me Bjellorusinë.
Letonia është në procesin e ndërtimit të një pengese të ngjashme.
Së bashku me Poloninë, Letonia dhe Lituania kanë akuzuar sundimtarin e gjatë të Bjellorusisë, Alexander Lukashenko për dërgimin e migrantëve në kufirin e jashtëm të BE-së, në mënyrë të organizuar për të ushtruar presion mbi Perëndimin.
Prandaj, tri vendet e BE-së dhe NATO-s kanë forcuar tashmë mbrojtjen e kufijve të tyre me Bjellorusinë. /atsh
