Përpjekjet për të siguruar një marrëveshje për një armëpushim midis Izraelit dhe Hamasit në Gaza janë ende në vazhdim, thotë agjencia e inteligjencës izraelite Mossad, pavarësisht nga zbehja e shpresave për një armëpushim gjatë muajit të shenjtë të Ramazanit.
“Kontaktet dhe bashkëpunimi me ndërmjetësit vazhdojnë gjatë gjithë kohës në përpjekje për të ngushtuar boshllëqet dhe për të arritur marrëveshje”, thuhet në një deklaratë.
Egjipti, Shtetet e Bashkuara dhe Katari kanë ndërmjetësuar negociatat e armëpushimit që nga janari.
Hamasi fajëson Izraelin për ngërçin në bisedimet për një armëpushim afatgjatë dhe lirimin e 134 robërve që besohet se mbahen ende në Gaza, duke thënë se refuzon të japë garanci për t’i dhënë fund luftës ose për të tërhequr forcat e tij nga enklava e shkatërruar nga lufta.
Në një deklaratë të shtunën me rastin e Ramazanit, shefi i Hamasit, Ismail Haniyeh u zotua se palestinezët do të vazhdojnë të luftojnë Izraelin “derisa të rifitojnë lirinë dhe pavarësinë”.
