I ngarkuari me punë i Arabisë Saudite në Ankara, Mohammed Alharbi, tha se mbretëria saudite do të vazhdojë mbështetjen e saj për viktimat e tërmeteve të javës së kaluar në Turqinë jugore “për aq kohë sa të jetë e nevojshme”.
Në një intervistë ekskluzive për Anadolu, Alharbi shprehu pikëllimin e tij për humbjet e jetëve dhe dëmet e shkaktuara nga tërmetet.
“Ne i shprehim ngushëllimet tona popullit turk dhe qeverisë turke për këtë pikëllim të madh dhe lusim Allahun që ta largojë sa më shpejtë këtë (fatkeqësi) nga Turqia, të mëshirojë të vdekurit dhe të shërojë të lënduarit”, tha Alharbi.
Lëkundjet e së hënës të javës së kaluar me intensitet 7.7 dhe 7.6, epiqendra e të cilave ishte në Kahramanmaraş, goditën nëntë provinca të tjera, Hatay, Gaziantep, Adıyaman, Malatya, Adana, Diyarbakır, Kilis, Osmaniye dhe Şanlıurfa. Ata gjithashtu shkaktuan shkatërrim të gjerë në Sirinë veriore.
Mbështetja e Arabisë Saudite
Alharbi tha se mbreti saudit, Salman bin Abdulaziz dhe princi i kurorës, Mohammed bin Salman, menjëherë u mobilizuan për të ndihmuar viktimat duke urdhëruar krijimin e “një ure ajrore menjëherë pas tërmeteve për të ofruar ndihma humanitare”.
Ndihma urgjente e përbërë nga furnizime mjekësore, ushqime dhe tenda së bashku me ekipet e shpëtimit dhe kërkimit ishin nga burime të ndryshme si Qendra e Mbështetjes dhe Ndihmës Humanitare e Mbretit Salman, Mbrojtja Civile Saudite dhe Gjysmëhëna e Kuqe Saudite.
Alharbi shtoi se ekipet përbëhen edhe nga vullnetarë.
Diplomati saudit tha se nëpërmjet “urës ajrore”, një ekip i pajisur me teknologji të lartë u dërgua gjithashtu për të “kërkuar të mbijetuarit dhe për të ndihmuar në shpëtimin e tyre”.
Duke theksuar se pjesëmarrja e shumë vendeve ndihmoi në shpëtimin dhe ndihmën e shpejtë për njerëzit e prekur nga tërmetet, ai tha se, “Mbretëria ka marrë pjesë me një ekip të madh dhe deri më tani ka nisur shtatë aeroplanë përmes urës ajrore dhe kjo praktikë do të vazhdojë për aq kohë sa është e nevojshme për këtë dhe për sa kohë që njerëzit kanë nevojë për mbështetje dhe ndihmë”.
Aksionet e donacioneve
Mbështetja saudite nuk ishte vetëm zyrtare, por po ndodh edhe në nivelin e qytetarëve.
Alharbi tha se udhëheqja e vendit “urdhëroi fillimin e një fushate kombëtare të ndihmës për njerëzit e prekur nga tërmeti në Siri dhe Turqi nën sloganin (Dhurimi juaj i lehtëson ata) përmes platformës zyrtare (Sahem)”.
Qëllimi i fushatës është që “populli i Mbretërisë së Arabisë Saudite të ketë mundësinë të mbështesë popullin turk në këtë rrugë”, tha ai, duke njoftuar se deri më tani donacionet e vazhdueshme kanë tejkaluar 350 milionë rijalë sauditë (93.2 milionë dollarë).
“Këto kontribute mund të shtohen në ditët në vijim, shpresoj, si dhe do të kontribuojnë për të ndihmuar të prekurit nga tërmeti që të kthehen në jetën normale”, tha Alharbi.
Koordinimi turko-saudit
I ngarkuari me punë saudit tha se ka pasur koordinim midis Riadit dhe Ankarasë për ofrimin e ndihmës, me takime që janë zhvilluar midis zyrtarëve nga të dyja palët që nga katastrofa.
“Që nga mbërritja e ekipit të parë dhe avionëve të parë, ka pasur takime intensive midis zyrtarëve sauditë në terren në Gaziantep dhe ndërmjet zyrtarëve në AFAD (Agjencinë Turke të Menaxhimit të Fatkeqësive)”, shtoi Alharbi.
Ai tha se koordinimi i ngushtë buronte nga pala saudite me “interesin e saj për të drejtuar ekipet e ndihmës dhe të kërkim-shpëtimit në vendet e duhura, të cilat tashmë janë dëmtuar dhe kanë nevojë për operacione shpëtimi, kërkim dhe ndihmë, si dhe klinika të përkohshme mobile për të trajtuar të lënduarit nga tërmeti”.
“Mbretëria e Arabisë Saudite si qeveri dhe popull janë gjithmonë të gatshëm për të ndihmuar të prekurit, dhe kjo është ajo që Mbretëria e Arabisë Saudite bën gjithmonë në ofrimin e ndihmës për njerëzit e prekur, veçanërisht vendet mike si Turqia”, shpjegoi ai.
Amidst the earthquake in #Syria and #Turkey, KSRelief has dispatched #Saudi rescue teams, 8 aid planes and 11 trucks carrying 104 tonnes of essentials. Sahem by KSRelief, a public platform to gather donations, has received £80 million from international donors. pic.twitter.com/cV6YDLP1EF
— Saudi Embassy UK (@SaudiEmbassyUK) February 15, 2023
