Në sulmet e ushtrisë izraelite në qytetin e Jeninit dhe kampin e refugjatëve Jenin në veri të Bregut Perëndimor të pushtuar, u vranë 6 palestinezë, përfshirë një mjek ndërsa 10 të tjerë u plagosën, transmeton Anadolu.
Në deklaratën e Ministrisë palestineze të Shëndetësisë thuhet se 6 palestinezë humbën jetën nga plumbat izraelitë në qytetin e Jeninit ndërsa 10 të plagosur, prej të cilëve 3 rëndë janë dërguar në spitale.
Drejtori i Spitalit Shtetëror të Jeninit, Visam Bekir tha se mes atyre që humbën jetën ishte edhe shefi i Departamentit të Kirurgjisë në spitalin e Jeninit. Sipas informacionit të siguruar nga burimet e sigurisë, forcat izraelite bastisën qytetin dhe kampin e Jeninit gjatë natës.
Dëshmitarët okularë njoftuan se mjete ajrore izraelite pa pilot fluturuan në qiellin e Jeninit dhe se një përleshje shpërtheu midis ushtarëve dhe grupeve të armatosura palestineze në qytetin ku ushtarët izraelitë e bastisën natën.
Që nga 7 tetori 2023, të paktën 512 palestinezë janë vrarë në sulmet e Izraelit në Bregun Perëndimor.
The post Në sulmin e ushtrisë izraelite në Bregun Perëndimor vriten 6 palestinezë first appeared on Radio Televizioni Iliria.