Ofensiva e planifikuar tokësore e Izraelit në Rafah, qyteti jugor i Rripit të Gazës, do të shkaktonte një situatë edhe më katastrofike në territor, paralajmëroi të martën ministri i Jashtëm i Norvegjisë, Espen Barth Eide.
“Jam thellësisht i shqetësuar nga numri i madh i vdekjeve në Rafah. Mbi 1.5 milion njerëz po kërkojnë strehim në një qytet që fillimisht numëronte rreth 280 mijë banorë”, tha kryediplomati norvegjez në një intervistë për Anadolu.
“Dallimi midis civilëve dhe objektivave ushtarakë në zonat me popullsi të dendur në Gaza është jashtëzakonisht i vështirë. Në rrethana të tilla, unë i bëj thirrje fuqishëm Izraelit të ndërpresë sulmet ajrore kundër Gazës”, shtoi Eide.
Duke vënë në dukje “pasojat katastrofike” që do të kishte një operacion tokësor në Rafah, ai nënvizoi se kjo “do të përkeqësonte situatën tashmë katastrofike” dhe do të rrezikonte përpjekjet humanitare.
“E drejta ndërkombëtare është e qartë se civilët duhet të mbrohen. Izraeli nuk po bën mjaftueshëm për të mbrojtur civilët. Nuk ka vende të sigurta në Gaza. Gjithashtu përsëris apelin tim për një armëpushim. Lufta duhet të përfundojë”, tha Eide.
Më shumë se 100 njerëz u vranë dhe qindra u plagosën në sulmet e ushtrisë izraelite këtë javë në Rafah, ku është planifikuar një ofensivë tokësore, e cila ka rritur shqetësimet për një katastrofë humanitare.
Palestinezët kanë kërkuar strehim në qytet ndërsa Izraeli goditi pjesën tjetër të enklavës që nga sulmi ndërkufitar i grupit palestinez Hamas më 7 tetor. Bombardimet izraelite që pasuan kanë vrarë 28.473 njerëz dhe kanë shkaktuar shkatërrim masiv dhe mungesë të gjërave elementare.
Sipas Kombeve të Bashkuara, për shkak të ofensivës izraelite, 85 për qind e popullsisë së Rripit të Gazës është zhvendosur brenda enklavës së bllokuar dhe përballet me mungesë akute të ushqimit, ujit të pastër dhe ilaçeve, ndërsa 60 për qind e infrastrukturës është dëmtuar ose të shkatërruar.
Izraeli akuzohet për gjenocid në Gjykatën Ndërkombëtare të Drejtësisë, e cila në vendimin e saj të përkohshëm tha se pretendimet e Afrikës së Jugut rreth çështjes të paraqitur në dhjetor ishin të besueshme.
