Presidenti i Turqisë, Recep Tayyip Erdoğan zhvilloi takime intensive diplomatike në ishullin Bali të Indonezisë ku u mbajt Samiti i Liderëve të G20, raporton Anadolu Agency (AA).
Takimi i parë i presidentit Erdoğan në Bali ishte me Joko Widodo, presidentin e Indonezisë, vendi i cili organizoi samitin.
Në Apurva Kempinski ku u mbajt samiti, Erdoğan u takua me Widodo-n dhe bisedoi me liderët para seancës së parë të Samitit të Liderëve të G20.
Erdoğan zhvilloi bisedime të ndara me presidentin e Kinës, Xi Jinping, kryeministrin e Indisë, Narendra Modi, presidentin e Francës, Emmanuel Macron, presidentin e Emirateve të Bashkuara Arabe (EBA), Sheikh Mohammed bin Zayed Al-Nahyan.
Presidenti turk u takua për herë të parë me kryeministren e Italisë, Giorgia Meloni.
U takua me presidentin e SHBA-së, Biden
Në kuadër të samitit, presidenti Erdoğan zhvilloi takim dypalësh me presidentin e SHBA-së, Joe Biden.
Në takim u diskutuan marrëdhëniet mes dy vendeve, kryesisht çështjet e tregtisë dhe sigurisë si dhe zhvillimet rajonale.
Presidenti amerikan Biden falënderoi presidentin Erdoğan për përpjekjet e tij për zgjidhjen e problemit në korridorin e drithit mes Rusisë dhe Ukrainës që siguroi rifillimin e dërgesave.
Biden tha se administrata e tij do të vazhdojë mbështetjen për procesin e F-16 mes Turqisë dhe SHBA-së ndërsa tha se Turqia është një aktore e rëndësishme në procesin e anëtarësimit të Suedisë në NATO.
Takim me presidentin e francez Macron
Në kuadër të samitit, Erdoğan u takua edhe me presidentin e Francës, Emmanuel Macron.
Në takimin ku u diskutuan çështjet rajonale dhe marrëdhëniet Turqi-Francë, Erdoğan tha se zhvillimi i marrëdhënieve të tregtisë si dhe në sektorin e mbrojtjes dhe energjisë është interes i përbashkët i të dy vendeve.
Duke rikujtuar se korridori i drithit filloi të funksionojë sërish pas përpjekjeve intensive, presidenti Erdoğan tha se edhe Bashkimi Evropian duhet të bëjë pjesën e tij për vazhdimin e marrëveshjes.
Takimet e tjera
Presidenti Erdoğan zhvilloi takime dypalëshe me kancelarin gjerman, Olaf Scholz, kryeministren italiane Meloni dhe me Princin e Kurorës së Arabisë Saudite, Mohammed bin Salman.
Në bisedimet e zhvilluara me dyer të mbyllura për median u diskutuan marrëdhëniet mes dy vendeve dhe çështjet rajonale.
Erdoğan mori pjesë në Samitin e Liderëve MIKTA
Me pjesëmarrjen e presidentit Erdoğan në Bali u mbajt gjithashtu edhe “Samiti i Liderëve MIKTA”.
Në samit morën pjesë edhe liderë të Meksikës, Indonezisë, Koresë së Jugut dhe Australisë.
Në deklaratën e përbashkët pas samitit u tha se MIKTA “do të vazhdojë të luajë rol konstruktiv në arenën globale dhe të kontribuojë në përpjekjet për të formuar konsensus në çështjet që ndikojnë tek të gjithë”.
